Qazirgi jahandaný zamanynda ár túrli mádenıet ókilderimen yntymaqtastyq ornatýdyń mańyzdylyǵy artyp keledi.
Osy maqsatta sheteldik Fulbright baǵdarlamasynyń stıpendıaty, Shyǵys Karolına Ýnıversıtetiniń doktory Djeımı Leıbovıs Mańǵystaýdaǵy Yessenov University stýdentterine Global Understanding («Jahandyq túsinik») jobasyn tanystyrdy. Jobanyń jergilikti koordınatory bolyp «Týrızm jáne tilder» fakýltetiniń «Álem tilderi» kafedrasynyń aǵylshyn tili páni muǵalimi Zamıra Pýlatova taǵaıyndaldy. Baǵdarlama aıasynda ol sheteldik áriptesimen stýdentterdi daıarlaý jáne saýatty qarym-qatynas qurý týraly jobany talqylady.
Djeımı Leıbovıstiń aıtýynsha «Jahandyq túsinik» jobasy álemdik deńgeıde iske asady. Ol tek stýdentterdi ǵana emes, oqytýshylardy da qamtyp otyr.
- Qazaqstanda talqylaǵan jobamyz eki tarapqa da qyzyq boldy. Sebebi munda jobaǵa qatysýshy jastar óte alǵyr, shapshań, aǵylshyn tilinde anyq, tereń sóıleýge qushtar eken. Mundaı zerek jastardy aýqymdy jobalarǵa kóbirek tartyp, múmkindikterin ashýǵa qoldaý bildirý kerek, – dedi D.Leıbovıs.
Jobaǵa qatysýshy stýdentter Soltústik Karolına shtatyndaǵy Grınvıll qalasynda ornalasqan Shyǵys Karolına ýnıversıtetindegi (ECU) stýdenttermen Zoom arqyly tikeleı baılanys ornatyp, birlese joba qorǵap shyqty. Eki eldiń stýdentteri túrli taqyryptardy zerttep, mańyzdy mádenı tujyrymdamalardy salystyrýǵa jáne BUU-nyń Turaqty damý maqsatyna negizdelgen máselelerdi qamtıtyn jobany qorǵady.
BUU turaqty damý maqsattary: kedeılikke, ashtyqqa jol joq, myqty densaýlyq pen baqýattylyq, sapaly bilim, genderlik teńdik, taza aýyz sý jáne sanıtarııa, tabıǵı, qoljetimdi energııa kózderi, laıyqty jumys jáne ekonomıkalyq órkendeý, ónerkásip, ınnovasııa jáne ınfraqurylym, teńsizdikti azaıtý, turaqty qalalar men qaýymdastyqtar, jaýapty tutyný jáne óndiris, klımattyń ózgerýine qarsy sharalar, sý astyndaǵy jáne qurlyqtaǵy ómir, beıbitshilik, ádilettilik jáne kúshti ınstıtýttar, maqsattarǵa jetý jolyndaǵy seriktestikter.
Stýdentter ınklıýzıvti bilim berý jáne life long learning ıaǵnı ómir boıy izdený, klımattyń ózgerýi, Kaspıı teńiziniń ekologııalyq jaǵdaıy, joǵaryda atalǵan eki eldiń tabıǵatty aıalaýdaǵy jaýapkershiligin arttyrý joldary, sý astyndaǵy ómirdi qorǵaý, bosaný kezindegi ana ólimin boldyrmaý syndy máselelerdi zerttep, sheshý joldaryn usyndy. Sondaı-aq olar amerıkalyq qurdastarymen dostyq qarym-qatynastaryn jalǵastyrý úshin GPS Connect jelilik platformasyn qoldandy. Eki aptaǵa sozylǵan joba nátıjesinde stýdentterge estelik syılyqtar men sertıfıkattar tabystaldy.
Jaına MOLDAǴALI