Aıagóz qalasyndaǵy kópbeıindi mektep-gımnazııasynyń 10-synyp oqýshylary Janerke Ysqaqova, Jánııa Álimǵazına, Janerke Zákirova jáne Áıgerim Erjanqyzy Ecobike dep atalatyn jańa joba jasap shyqty.
Zamanaýı velosıped iske qosylǵanda, birneshe qyzmet túrin atqara alady. Mysaly, trenajer retinde paıdalanǵan adam densaýlyǵyn nyǵaıtýmen qatar sporttyq jattyǵý arqyly bulshyqetterin shynyqtyrady. Ǵajaby sol, jattyǵý jasaý barysynda qurylǵydaǵy generator qosylyp, tegin elektr energııasy óndiriledi. Sol arqyly ár túrli qosymsha quraldardyń kómegimen turaqty tokqa túrlenip, 220 voltqa deıingi kerneýge jetkizip, uıaly telefon men planshetti qýattaýǵa bolady. Iаǵnı elektr energııasyn únemdeý kózi retinde qarastyrylǵan. Qosalqy bólshek retinde keskish-usaqtaǵyshy bar qoqys jáshigin ornatqan. Mekemedegi plastık, qaǵaz túrindegi qoqysty usaqtap iske jaramdy etip qaıta óńdep, balqytyp, ár túrli pishindegi kádesyılar, buıymdar jasaýǵa da bolady.
О́nertapqysh oqýshylar bolashaqta osyndaı artyqshylyǵy kóp qurylǵynyń bes túrin jasaýdy oılastyryp otyr. Mekteptiń úsh qabatyna ólshemderin túrlendirip, bastaýysh býyn, orta býyn jáne joǵary synyp oqýshylary men muǵalimder, mektep qyzmetkerlerine ár dálizge eki-ekiden velosıped qoımaq oılary da bar.
– Isten shyqqan velosıped bólshekterin alyp, kez kelgen dızaında túrlendirip jasaýǵa bolady. Ol úshin 12 voltqa deıingi generator kerek. Generatordan shyqqan elektr toǵyn jınaqtap, aınymaly toqtan turaqty toqqa aınaldyratyn túrlendirgish qural arqyly akkýmýlıatorǵa jınaqtadyq ta 12 volttan 220 voltqa deıin kóterdik. Uıaly telefondy, keskish quraldy da qýattaýǵa bolady. Qurylǵyǵa arnaıy ornatylǵan baǵdarlama qoqys jáshigi tolǵan kezde telefon nemese planshetke datchık arqyly habarlama beredi. Habarlama kelgennen keıin jáshikti bosatyp, qaıta qoqys jınaýǵa kirisedi, – deıdi «aqyldy» velosıped avtorlary.
Qazir mektep oqýshylary qurylǵyǵa qyzyǵýshylyq tanytyp, sabaq arasyndaǵy qońyraýda trenajer retinde paıdalanyp júr. Jobany tabys kózine de aınaldyryp, bilim berý mekemelerinde ǵana emes, kez kelgen qoǵamdyq oryndarda paıdalanýǵa bolady. Ári densaýlyqqa paıdaly, tegin elektr energııa kózi, sondaı-aq plastık qoqystardy qaıta óńdeý úshin taptyrmaıtyn ónim.
Tyń joba usynǵan oqýshylardyń jetekshileri qazaq tili men ádebıeti páni muǵalimi Aınur Qanapııanova, fızıka jáne ınformatıka pánderiniń muǵalimi Merýert Kúnisova, syzý páni muǵalimi Berik Ysqaqov, ınformatıka páni muǵalimi Samal Sársembekova ekenin eske sala keteıik.
Abaı oblysy,
Aıagóz qalasy