Qatardyń Doha qalasynda nysana kózdeýden álem kýbogi bastaldy. Jerlesimiz Ásem Orynbaı stend atýdyń skıt baǵdarlamasynyń fınaldyq saıysynda 51 upaı jınap jeńiske jetti, dep habarlaıdy Egemen.kz Týrızm jáne sport mınıstrliginiń baspasóz qyzmetine silteme jasap.
Álem kýboginiń kúmis medali Italııa sportshysy Kıara Dı Marsıantonıoǵa buıyrdy, qola medaldi AQSh sportshysy Danııa Djo Vıssı enshiledi. Álem kýbogine AQSh-tan taǵy bir sportshy qatysqan. Jazǵy Olımpıada oıyndarynyń úsh dúrkin chempıony Kımberlı Roýǵa júlde buıyrmady.
«Ásem Orynbaıdy álem kýbogi jarysyndaǵy jeńisimen shyn júrekten quttyqtaımyn. Bıyl Ásem úshin óte tabysty maýsym boldy. Máselen, ol Qytaıdaǵy Azııa oıyndarynda eki altyn, bir qola medal jeńip alsa, mine arada kóp ýaqyt ótpeı álem kýboginde qarsylas shaq keltirmedi. Bul – tamasha kórsetkish. Otandasymyz aldaǵy baıraqty básekelerde de jankúıerlerin qýantyp, úzdikter qatarynan kórinetinine senimdimin. Nysana kózdeýdegi bul jeńis osy sport túrimen aınalysatyn jastardy bıik belesterdi baǵyndyrýǵa yntalandyrady», dedi Týrızm jáne sport mınıstri Ermek Marjyqpaev.
Halyqaralyq nysana kózdeý federasııasy (ISSF) álem kýbogin tórt jyldyq úzilisten keıin ótkizdi. 42 elden kelgen 179 sportshy synǵa túsip otyr. ISSF reıtınginde Ásem Orynbaı 7-satyda tur.