BUU-nyń Áıelderge qatysty kemsitýshiliktiń barlyq túrin joıý konvensııasyna sáıkes 25 qarashadan 10 jeltoqsanǵa deıin elimiz boıynsha «Zorlyq-zombylyqqa qarsy belsendiliktiń 16 kúni» atty respýblıkalyq aksııa júrip jatyr. Aksııanyń basty maqsaty – áıelderge qatysty zorlyq-zombylyqtyń aldyn alý, boldyrmaý jáne jolyn kesý, ana men balany, olardyń ómirin qorǵaý, sondaı-aq otbasylyq qundylyqtardy nasıhattaýǵa baǵyttalǵan.
Is-shara aıasynda Ishki ister mınıstrligi múddeli memlekettik organdardyń, úkimettik emes jáne halyqaralyq uıymdardyń ókilderin, barsha halyqty aksııaǵa belsendi qatysýǵa shaqyrady. Ákimshilik polısııa komıtetiniń Erekshe tapsyrmalar jónindegi aǵa ınspektory, polısııa podpolkovnıgi Aqmaral Serikbaevanyń aıtýynsha, aksııa barysynda ishki ister organdarynyń qyzmetkerleri múddeli memlekettik organdar men úkimettik emes uıymdarmen birlesip, halyq arasynda aqparattyq túsindirý jumystaryn júrgizip jatyr. Aksııa bastalǵan kúnnen bastap barlyq óńirde 50-den astam baspasóz máslıhaty ótkizildi.
«Aqparattyq túsindirý jumystary aıasynda áıelderge qatysty barlyq zorlyq-zombylyqtyń aldyn alý jáne boldyrmaý, halyqqa osy salada istelip jatqan sharalar men zańnamalardaǵy ózgeristerdi tanystyrýdy maqsat etip otyrmyz. Sondyqtan is-sharalar aýqymy halyq kóp jınalatyn jerlerde ótip jatyr. Qazir elimiz boıynsha halyq kóp jınalatyn qoǵamdyq jerlerde 3 kúnniń ózinde ǵana 70-ten asa is-shara uıymdastyryldy. Sondaı-aq oqý oryndarynda, eńbek ujymdarynda túrli dáris uıymdastyrylyp, zańdaǵy sońǵy ózgerister men tolyqtyrýlar, respýblıka kóleminde jumys istep turǵan senim telefondary týraly aqparattandyrý jumystary júrip jatyr», deıdi Aqmaral Abzalqyzy.
Búginde eldegi turmystyq zorlyq-zombylyq boıynsha soǵylǵan qońyraý men qozǵalǵan isterdiń statıstıkasy jaǵa ustatady. Máselen, on aıdyń qorytyndysy boıynsha turmystyq zorlyq-zombylyqqa qatysty 82 myńǵa jýyq ákimshilik shaǵym men habarlama túsken. Onyń ishinde 60 myńnan astamyna ákimshilik is qozǵaldy. Byltyrmen salystyrǵanda ákimshilik is qozǵaý 20 paıyzǵa ósken. Onyń sebebi 1 shildeden bastap ákimshilik is qozǵaý aryzdanýdan anyqtaý sıpatyna kóshti. Zańnamadaǵy jańa ózgerister on aıdaǵy otbasylyq zorlyq-zombylyq qylmystarynyń tórtten eki paıyzǵa tómendeýine de septigin tıgizgen.
Sondaı-aq A.Serikbaevanyń sózinshe, zań shyǵarýshy organ úkimettik emes uıymdardyń petısııasyn negizge alyp, zańdarǵa ózgertý engizse, tıisti tapsyrmany oryndaý zańǵa sáıkes quqyq qorǵaý organdaryna júkteledi.
«Buryn quqyq qorǵaý qyzmetkeri jábirlenýshiniń aryzynsyz ákimshilik is qozǵaı almaıtyn. Mysaly, byltyr 115 myńnan astam aryz-shaǵym kelip tústi. Onyń 75 myńnan astamy jábirlenýshiniń aryzdy keri qaıtaryp alýy sebebinen jabýly kúıinde qaldy. Ol ýaqytta aryz boıynsha isti qaramaý sekildi birdi-ekili fakti boldy. Qazir bizge eshkimniń aryzy kerek emes. Quqyq buzýshylyq faktisi bolsa, birden ákimshilik is qozǵalady. Zańdaǵy bul ózgeriske saı áreket etpegen quqyq qorǵaý qyzmetkeri qylmystyq jaýapkershilikke tartylady. Al qoǵamdyq rezonans týdyrǵan Qyzylorda qalasyndaǵy qylmystyq oqıǵa boıynsha ishki ister organdarynyń qyzmetkerleriniń soty aıaqtalyp, qylmystyq jaýapkershilikke tartyldy», deıdi ol.
Qoǵamdaǵy quqyq buzýshylyqqa nóldik tózimdilikti arttyryp, halyqtyń otbasylyq zorlyq-zombylyq týraly aqparattanýy mańyzdy. Sondyqtan quzyrly organ ımıdjdik is-sharalardan bólek otbasynda quqyq buzýshylyq jasaýǵa beıim adamdardy, sondaı-aq jaısyz otbasylardy turǵylyqty jeri boıynsha tekserýdi de josparlap otyr.