Jyl saıyn halyqtyń qaryz somasy 30 paıyzǵa artyp otyr. Qaryzdyń negizgi bóligi tutynýshylyq nesıe. Sondyqtan problemaǵa ákelip soqtyrýy múmkin nesıelerdi berýdi shekteý úshin qosymsha sheshimder qabyldaý qajet. Muny búgin Salyq kodeksine jáne salyq salý máseleleri boıynsha ózgerister men tolyqtyrýlar engizý týraly zańdardy qaraý barysynda Senat Tóraǵasy Máýlen Áshimbaev málimdedi, dep habarlaıdy Egemen.kz joǵarǵy Palatanyń baspasóz qyzmetine silteme jasap.
«Bul zańda jeke tulǵalardyń kiristerin bosatý normalary bar. Olar kollektorlyq uıymdar osy tulǵalardyń qaryzdaryn esepten shyǵarǵan kezde qalyptasady. Iаǵnı, olar esepten shyǵarylady, biraq kiris retinde eseptelmeıdi jáne sáıkesinshe salyq alynbaıdy. Taǵy bir mysal, mıkroqarjy uıymdary problemaly qaryz alýshylardyń mıkrokredıtterin esepten shyǵarýyna baılanysty tabysqa salyq salýdan úsh jylǵa bosatylady. Bul –azamattardyń qaryzdaryn esepten shyǵaratyn mıkrokredıttik uıymdardy memleket tarapynan qoldaý úshin jasalǵan qadam. Mundaı tásil atalǵan uıymdardy yntalandyrady dep senemiz. Jalpy, aldaǵy ýaqytta zańdy túsindirý kezinde onyń ustanymdaryn durys túsiný qajet. Bul zań qaryz alýshylar men keıbir nesıe berýshilerdiń jaýapsyz áreketterin yntalandyrý retinde qabyldanbaýy kerek», dedi M. Áshimbaev.
Máýlen Áshimbaev halyqtyń nesıe alyp, qaryzdanýyn tómendetý úshin barlyq múddeli tarap belsendi jumys júrip jatqanyn aıtty. Bul baǵyttaǵy basym mindetterdiń biri – qaıtarylmaıtyn nesıelermen jumys isteý.
«Munyń bári biz adamdardy odan ári nesıe alýǵa, olardy qaıtarmaýǵa, keıin nesıelerdi esepten shyǵarýǵa yntalandyramyz nemese mıkrokredıttik uıymdar olardy esepten shyǵarady degendi bildirmeıdi. Adamdardy oǵan ıtermelemeýimiz kerek. Qalaı bolǵanda da, biz úshin halyqtyń nesıe alyp, qaryzdanýyn tómendetý mańyzdy. Biz bul máseleni birinshi ret kóterip otyrǵan joqpyz. Sońǵy kórsetkishterdi qarastyrsaq, bizde osy jyldyń on aıynda tutynýshylyq nesıeler boıynsha halyqtyń merzimi ótken qaryzy shamamen 18%-ǵa ósken. Bul jóninde jyl basynan beri aıtyp kelemiz. Soǵan qaramastan merzimi ótken bereshek, jalpy halyqtyń qaryzy azaımaı, kerisinshe, ósip otyr. Qazir qabyldap otyrǵan normalarmen biz keıbir máselelerdi sheshýge tyrysamyz. Alaıda, bul memleket nesıeni qaıtarmaýdy yntalandyrady dep qabyldanbaýy qajet. Osy baǵytta biz Úkimet ókilderimen, memlekettik organdarmen, Ulttyq Bankpen, Qarjy naryǵyn retteý jáne damytý agenttigimen belsendi jumys isteýimiz kerek», dedi Senat Spıkeri.