Halyqaralyq shahmat federasııasy (FIDE) álemniń eń úzdik oıynshylarynyń reıtıngin jarııalady. Úzdikter tiziminde Qazaqstannyń da ókilderi bar.
Erlerge qaraǵanda bizdiń qyzdar áldeqaıda tabysty óner kórsetip tur. Áıelderdiń reıtınginde Bıbisara Asaýbaev men Jansaıa Ábdimálik qatar tur. Olar 16 men 17-oryndardy ózara bólisken. Bıbisara – 2 472 jáne Jansaıa 2 468 upaıdan enshilegen. Dınara Sádýaqasova (2 435) 35-oryndy ıelense, Merýert Kamalıdınova (2 383) 70-satyǵa jaıǵasty. Al qytaılyq Hoý Ifan (2 632) jeke-dara bastap tur. Ekinshi orynda onyń otandasy – Szıýı Venszıýn (2 560). Úndistandyq Konerý Hampı (2 554), reseılik Aleksandra Gorıachkına (2 553) jáne Qytaı eliniń taǵy bir ókili Leı Tınsze (2 550) – ozyq bestiktiń qatarynda.
20 jasqa deıingi shahmatshylar arasynda Bıbisara Asaýbaeva aldyna jan salar emes. Ol 2 472 upaıdy oljalap otyr. Odan keıingi oryndarda – Velpýla Saraıý (Úndistan, 2 444), Nurgúl Salımova (Bolgarııa, 2 426), Leıa Garıfýllına (Reseı, 2 423) jáne Dıvıa Deshmýh (Úndistan, 2 420). Sonymen qatar bizdiń Bıbisara rapıdpen (áıelder) jáne blısten (U-20) álemdik reıtıngte birinshi orynda tur.