Jaqynda Astana qalasyndaǵy Dene shynyqtyrý jáne buqaralyq sport akademııasyna halyqaralyq Abaı atyndaǵy mádenıet pen ónerdi qoldaý qorynyń dırektory Aslan Ǵafýrov bastaǵan top qonaqqa keldi.
Sport akademııasynda ótken dóńgelek ústelge joǵary oqý ornynyń rektory Bolatbek Dúketaev, akademııanyń prorektorlary Aıbol Kólbaev, Tursynzada Qýanǵalıeva, L.N.Gýmılev atyndaǵy Eýrazııa ulttyq ýnıversıteti janyndaǵy «Abaı» akademııasy ǴZI jetekshisi Jandos Áýbákir jáne aqparat quraldary ókilderi, ǵalymdar qatysty.
– Abaı danyshpan ulttyq sport túrlerine de beıjaı qaramaǵan. Báıge attaryn ustaǵan, kókpar dese eleńdep, úıinde otyra almaǵan. Kókparshylarǵa aqyl-keńes berip otyrǵan. Bizdiń Astanadaǵy sport akademııasyna kelip, memorandýmǵa qol qoıýdaǵy maqsatymyz – bilim alyp jatqan jastardyń boıynda eli men jerin súıetin qasıet qalyptastyryp, sportta jaqsy nátıjelerge jetý, – dedi A.Ǵafýrov.
Akademııa rektory Bolatbek Asylbekulynyń aıtýynsha, ashylǵanyna nebári eki jyl bolǵan oqý ornynda bul kúnderi 800-ge tarta sport sańlaqtary men bolashaq bapkerler bilim alyp jatyr.
Memorandým aıasynda taraptar ǵylymı-ádisnamalyq, aqparattyq, saraptamalyq qyzmet salasynda, sondaı-aq sport salasynda ulttyq qundylyqtar negizinde birlesken jobalardy júzege asyrý, konferensııalar, dóńgelek ústelder uıymdastyrý, konsýltasııalyq kómek kórsetý baǵytynda yntymaqtastyq ornatpaq. Ulttyq sport túrlerinen túrli deńgeıdegi dúbirli jarystardy jıi ótkizip turý basty nazarda bolmaq.
Sport akademııasy men «Abaı» qory osylaısha ıgilikti isti qolǵa aldy. Is-shara barysynda akademııa stýdentteri Abaıdyń qara sózderine negizdelgen qoıylym qoıyp, ózderiniń bilimdi ekenin kórsetti.
Ońdasyn ELÝBAI,
jýrnalıst
ASTANA