Sportsúıer qaýymnyń esinde bolsa, jaqynda ǵana Astana qalasynda bokstan jasóspirimder arasynda ótken Azııa birinshiliginde taýly óńirdiń túlegi Tolǵanaı Qasymhan top jaryp, Azııa chempıony atanǵan edi. Bul qýanyshty habardy estigen el-jurt boksshy qyzdy zor qurmetpen kútip alyp, artynsha tileýin tilep jasóspirimder arasyndaǵy álem chempıonatyna shyǵaryp saldy. Álem birinshiliginde de bylǵary qolǵap sheberi Tolǵanaıǵa tótep berer qarsylas tabylmady.
Armenııanyń astanasy Erevan qalasynda Tolǵanaı Qasymhan álem chempıony atanyp, kók týymyzdy kókke kóterip, elimizdiń mereıin ústem etti.
Sport dese, ishken asyn jerge qoıatyn bylǵary qolǵap sheberi Tolǵanaı Bolatqyzy 2007 jyly 16 shildede Raıymbek aýdany Narynqol aýylynda Aqynovtar áýletinde dúnıege kelgen. Ata-anasy Bolat Aqynov pen Jazıra Sálimjanova 5 balany dúnıege ákelgen. Kópbalaly otbasynda ósip kele jatqan jas boksshy qyz qazirgi tańda Narynqol aýylyndaǵy B.Soqpaqbaev atyndaǵy mektep-gımnazııanyń 11-synybynda oqıdy. Mekteptegi úlgerimi de óte jaqsy. Qoǵamdyq is-sharalar men sport úıirmelerine belsene aralasady. «Altyn belgige» úmitker oqýshylardyń biri.
Aıadaı aýyldyń ǵana emes, esimi elimizge tanyla bastaǵan Tolǵanaı bala jastan sportpen shuǵyldanady. Buǵan deıin de jetken jetistikteri az emes. Atap aıtsaq, bokstan Raıymbek aýdanynyń 4 dúrkin, Almaty oblysynyń 5 dúrkin jeńimpazy atanǵan. Sport sańlaǵy E.Ibraımovtyń qurmetine arnalǵan halyqaralyq týrnırde 3-oryndy ıelengen. D.Smaǵulovtyń júldesine arnalǵan respýblıkalyq týrnırde 1-orynnan kórinip, «Jyldyń eń úzdik boksshysy» kýbogin jeńip alýy da balǵyn boksshynyń bolashaǵynan mol úmit kúttirgen edi. Jalańtós bahadúrdi eske alýǵa arnalǵan respýblıkalyq týrnırde 2-orynǵa taban tiredi. Qostanaı qalasynyń ashyq chempıonatynda júldeli 1-orynnan boı kórsetti. Sondaı-aq D.Smaǵulovtyń júldesine arnalǵan Azııa chempıonatyna irikteýden 1-oryndy qanjylaǵan. Birneshe respýblıkalyq, halyqaralyq týrnırdiń jeńimpazy atanǵan Tolǵanaı endi mine, álem chempıony atanyp otyr. Bul jeńisterdiń artynda mańdaı ter men qajyr-qaırat, tabandy eńbek turǵany túsinikti.
Armenııadaǵy aqtyq synda Tolǵanaı reseılik Kıra Leonovany 3:2 esebimen jeńdi. Qarsylasyn Z-raýndta nokdaýnǵa jiberip, kúshiniń basym ekenin dáleldedi.
Álem chempıony Raıymbek aýdandyq «Balalar men jasóspirimder sport mektebi» kommýnaldyq memlekettik mekemesinde bilikti bapker Izbasar Qalqamannan tálim alady. Shákirttiń jeńiske jetýine bapkerdiń qosqan úlesi orasan zor.
Shekara shebinde ornalasqan Narynqol aýlynan álem chempıony shyqqanyna aýdan halqy dán rıza. Bilekti de júrekti Tolǵanaıǵa aldaǵy ýaqytta da jeńis tileımiz.
Almaty oblysy