Májilistiń jalpy otyrysynda Erjan Beısenbaev depýtattyq saýalyn Premer–mınıstrge joldap, daryndy jastardy elge qaıtarý máseleleri jóninde sóz qozǵady, dep habarlaıdy Egemen.kz.
Depýtattyń sózinshe Memleket basshysy 2021 jyly sheteldik ınvestorlar keńesiniń plenarlyq otyrysynda ozyq tehnologııaly halyqaralyq kompanııalarda jumys istegen tájirıbeli otandastarymyzdy tartý baǵdarlamasyn iske qosý jónindegi KıPıEmDjı (KPMG) kompanııasynyń bastamasyn qoldaýǵa Úkimetti shaqyrǵan. «Aqjol» partııasy tolyq qoldap, sol jylǵy 30 jeltoqsanda Prezıdent tapsyrmasynyń oryndalý barysy týraly Úkimetke saýal joldaǵan, alaıda saýaldaǵy naqty suraqqa naqty jaýap ala almaǵan.
Erjan Beısenbaevtyń saýalynsha qazirgi kezde Qazaqstannan bilimdarlardyń ketýi úlken problemaǵa aınalyp otyr. Shetelderdiń JOO-larynda bilim alyp myqty maman bolyp shyqqan daryndy jastarymyzdy sol eldiń kompanııalary turaqty jumys ornymen, úlken eńbek aqymen, áleýmettik paketpen qyzyqtyryp, ózderinde qaldyrýǵa tyrysady.
«Mysaly Reseı ýnıversıtetteri men kolledjderinde Qazaqstan mektepteriniń 70 myńdaı túlekteri bar eken. Bunyń basty sebebi qazaq talapkerlerin UBT-ileýsiz qabyldap, grant, stıpendııa, jataqhana, támamdaǵannan keıin jumys ornyn usynatyndyǵy tipti azamattyq beretindigi jasyryn emes. Kóptegen qazaq jastary buǵan qyzyǵýshylyq tanytyp júr. О́ıtkeni UBT tapsyrýdyń ózi qanshama jyldar boıy naǵyz stresske aınalyp ketti. Kún-tún daıyndalyp, nátıjesinde tıisti ball ala almaǵan oqýshylardyń sýısıdke deıin barǵan faktileri de bolǵan. Kórshiles elge zeıin qoıyp ottyrǵanymyz, júrip jatqan soǵys saldarynan demografııalyq jáne jumys kúshi problemalaryn sheshý úshin Reseı Qazaqstan jastaryn ózińde qaldyrýǵa múddeli jáne bul baǵytta barynsha jaǵdaı jasaýy ábden múmkin, bul degenimiz – jumys ornymen qamtýdan bastap laıyqty jalaqy, baspana berý t.b. sol sııaqty áreketter», dedi depýtat.
Osy oraıda «Aqjol» partııasy depýtattary atynan E.Beısenbaev naqty suraqtardy alǵa tartty.
«Úkimet Prezıdenttiń tapsyrmasyn oryndaý barysynda myqty halyqaralyq tehnologııalyq kompanııalardyń otandastarymyzdy qaıtarý jónindegi baǵdarlamasyn qabyldady ma? Jáne sol boıynsha daryndy jastarymyzǵa qandaı jaǵdaı jasalǵan, qandaı kompanııalardan qansha jas elge oralǵandyǵy jóninde aqparat berýdi suraımyz. Reseı tájirıbesin paıdalana otyryp, daryndy jastardy Qazaqstan ýnıversıtetterine UBT tapsyrtpaı, basqa jolmen qabyldaýǵa ruqsat berýdi usynamyz. Reseı nemese basqa sheteldik ýnıversıtetterden túlekterdi ákelý ǵana emes, ózimizdiń jastardy jumyspen, baspanamen qamtý máseleleri boıynsha qandaı is-sharalar júrgizilip jatyr», degen suraqtarmen sózin támamdady depýtat E.Beısenbaev.