Parlament Senatynyń Tóraǵasy, Qazaqstan bochcha federasııasynyń Prezıdenti Máýlen Áshimbaev bochchadan el Kýbogi sarapqa salynǵan jarystyń jabylý rásimine qatysyp, jeńimpazdardy marapattady, dep habarlaıdy Egemen.kz joǵarǵy Palatanyń baspasóz qyzmetine silteme jasap.
Quttyqtaý sózinde Máýlen Áshimbaev jarystyń joǵary deńgeıde ótkenin jáne erekshe sportshylardyń sheberlikteri men tabandylyqtaryn aıryqsha atap ótti. Sondaı-aq bochcha federasııasynyń qyzmetin qorytyndylap, aldaǵy jumys josparyna toqtaldy.
«Aldymyzda aýqymdy mindetter tur. Kelesi jyly birqatar is-shara uıymdastyrýdy josparlap otyrmyz. Alǵash ret bochchadan ulttyq jasóspirimder quramasyn jasaqtaımyz. Týrızm jáne sport mınıstrliginiń jáne demeýshilerdiń qoldaýymen kelesi jyly el chempıonaty, respýblıka Kýbogi, Sultanbek Orynbasarovty eske alýǵa arnalǵan ashyq týrnır sııaqty az degende úsh iri respýblıkalyq jarys uıymdastyrýdy kózdep otyrmyz. Odan bólek, ulttyq quramamyz birqatar halyqaralyq dodalarǵa qatysady», degen Máýlen Áshimbaev jarysqa qatysýshylarǵa jáne parasportshylarǵa qoldaý kórsetken jattyqtyrýshylar men ata-analarǵa alǵys bildirdi.
Aıta ketsek, bochchadan QR-nyń Kýbogi úshin jarys jeltoqsannyń 8-9 kúnderi ótip, elordada J.Úshkempirov atyndaǵy jekpe-jek saraıynda elimizdiń 10 óńiriniń 64 sportshysy saıysty.