Soltústik Qazaqstan oblysynda jeltoqsanda zerthanalyq tekserý rastaǵan qyzylshanyń 75 jaǵdaıy tirkeldi. Sonyń ishinde 68-i – Petropavl qalasynda, ekeýi – M.Jumabaev aýdanynda jáne bir-birden Aqqaıyń, Aıyrtaý, Mamlıýt, Qyzyljar, Jambyl aýdandarynda tirkelgen.
Qyzylshanyń taralýyn anyqtaý barysynda onyń bir-birden Birikken Arab Ámirlikterinen, Reseı Federasııasynan jáne Qyrǵyzstan respýblıkasynan ákelingeni rastaldy.
Soltústik Qazaqstan oblysynyń sanıtarııalyq-epıdemıologııalyq baqylaý departamentiniń basshysy Áset Jumataevtyń aıtýyna qaraǵanda, jas qurylymy boıynsha syrqattanǵandardyń eń kóbi 15 jasqa deıingiler arasynda anyqtalǵan. Ondaılardyń sany – 49 adam, bul – barlyq syrqattyń 65%-y. Al 15-ten 19-ǵa deıingiler arasynda – 23 syrqat, 20 men 29 jastaǵylar arasynda 14 adamnyń qyzylsha juqtyrǵany belgili boldy. Osynyń ózi bul derttiń jas balalar men jasóspirimder arasyna tez taralatynyn kórsetip otyr.
Barlyq tirkelgen naýqastyń 79%-y – vaksına almaǵandar. Bulardyń sany – 59 adam. 22 naýqas vaksınadan jeke senimi boıynsha bas tartqan, al 33 adam ózderiniń vaksınalaýdan habary bolmaǵanyn aıtqan. Qalǵany – medısınalyq kórsetkishter boıynsha ekpeden bosatylǵandar jáne vaksınalaý jasyna jetpegender.
Eresekterdi áleýmettik-kásiptik qurylym boıynsha zerttegende naýqastardyń eń kóbi Áskerı ınstıtýttyń qyzmetshileri arasynan shyqqan. Qyzylshaǵa ushyraǵan barlyq adamnyń 29-y, ıaǵnı 39%-y osylarǵa tıesili bolyp otyr. Kútimi az balalar arasynan 15 adamnyń naýqas ekeni anyqtaldy. Al oqýshylar arasynan 10 balanyń syrqat ekeni belgili bolǵan.
«Qyzylshanyń aldyn alýdyń birden-bir senimdi joly vaksınalaý ekenin eskere otyryp, qyzylshanyń odan ári taralýyn boldyrmaý úshin elimizdiń Bas memlekettik sanıtarlyq dárigeri «Qyzylshaǵa qarsy sanıtarııalyq-epıdemııaǵa qarsy jáne sanıtarııalyq-profılaktıkalyq is-sharalardy júrgizý týraly» 2023 jylǵy 1 qarashadaǵy №7 qaýlyǵa qol qoıdy. Osyǵan sáıkes 2023 jylǵy 6 qarashadan bastap qyzylshaǵa, qyzamyq jáne parotıtke qarsy qosymsha jappaı ımmýndaý júrgizý jalǵasyp jatyr. Oblysta qyzylshaǵa qarsy 3 900-deı bala jospardan tys ekpe aldy. Onyń ishinde týǵanyna 6 aıdan 11 aıǵa deıingi bóbekter – 1 103, 2 jasqa deıingi sábıler – 709, 2 jastan 4 jasqa deıingiler – 2 077 jáne t.b bolǵan. Sonymen qatar 86 medısına qyzmetkerine vaksına egilgen», dedi Á.Jumataev.
Qazaqstanda sıpattamalary boıynsha DDU-nyń barlyq talabyna sáıkes keletin, el aýmaǵynda tirkelgen vaksınalar qoldanylady. Qyzylsha aýa tamshylary arqyly beriletin qaýipti ınfeksııalyq aýrýǵa jatady. Qyzylshanyń aldyn alýdyń eń tıimdi joly – vaksına alý. «О́z densaýlyǵyńyzdy kútińizder, asqynýlardy boldyrmaý jáne basqalarǵa juqtyrmaý úshin syrqat paıda bolǵan kezde dereý medısınalyq kómekke júginińizder», dedi Á.Jumataev.
Soltústik Qazaqstan oblysy