«Samuryq-Qazyna» ulttyq ál-aýqat qory» AQ Qoǵamdyq keńesi ınvestısııalyq jobalardyń monıtorıngin talqylady. Jıynda ınvestısııalyq jobalarǵa monıtorıng júrgizý tártibi týraly sóz bolyp, Qordyń monıtorıngke qatysty tásilderi qaraldy. Búginde Qordyń turaqty monıtorıngine jatatyn iri ınvestısııalyq jobalar portfelinde munaı-gaz, munaı-hımııa, energetıka, kólik-logıstıka jáne basqa da salalardaǵy 42 joba bar. Olardyń jalpy quny shamamen 24 trln teńgege baǵalanyp otyr.
«Samuryq-Qazyna» AQ strategııa jáne aktıvterdi basqarý jónindegi basqarýshy dırektory Ernat Berdiǵulov Qoǵamdyq keńes múshelerine Qordyń iri ınvestısııalyq jobalaryna monıtorıng júrgizýdiń negizgi quraldary jáne osy baǵytta sońǵy ýaqytta engizilgen jańalyqtar týraly aıtyp berdi. Onyń aıtýynsha, Qor júrgizetin monıtorıng yqtımal táýekelderdi jedel anyqtaýǵa jáne túzetý sharalaryn jedel qabyldaýǵa múmkindik beredi.
«Qurylys alańyndaǵy jumystyń kólemi, jobalyq kesteniń oryndalýy, ıgerý somasy, aptalyq jumys josparynyń oryndalý dárejesi jáne basqa da máseleler turaqty negizde taldanyp otyrady. Qordyń Dırektorlar keńesiniń tapsyrmasyna sáıkes ınvestısııalyq jobalardy júzege asyrýǵa Qordyń 50 paıyz salmaǵy bar korporatıvtik paıdaly áser koeffısıenti (PÁK) jáne portfeldik kompanııalardyń 30-40 paıyz salmaǵy bar korporatıvtik PÁK engizilgen. Sáıkesinshe bul portfeldik kompanııalardyń jobalardy tıimdi basqarýyna zor yqpal etti», dedi Ernat Berdiǵulov.
Baıandamada jumystardyń kólemi men merzimin obektıvti baǵalaýdy, jobada kózdelgen is-sharalardyń hronologııasyn eskere otyryp, barlyq joba boıynsha egjeı-tegjeıli kestelerdi bekitý máseleleri de aıtyldy. Osy is-sharalardyń barlyǵy Qorǵa jobanyń yqtımal táýekelderine jedel den qoıýǵa jáne túzetý sharalaryn jyldam qabyldaýǵa múmkindik beredi.
Baıandama sońynda Qor tarapynan ınvestısııalyq jobalarǵa monıtorıng júrgizý tetikterin jetildirý jumystary odan ári jalǵasatyny málimdeldi. Atap aıtqanda, ortamerzimdi keleshekte jobalarǵa avtomattandyrylǵan monıtorıng júıesin engizý josparlanǵan. «Bul jumys múldem atqarylmaǵan dep aıtý qıyn, óıtkeni qatarlas portfeldik kompanııalarda tanymal júıeler istep keledi. Alaıda Qorda maqsattarymyzǵa saı avtomattandyrylǵan, barlyq tarapqa yńǵaıly júıeni engizý jospary bar», dedi Ernat Berdiǵulov.
Qazirgi ýaqytta Qor monıtorıng jasaıtyn 42 jobanyń úsheýi júzege asyrý satysynda.
«Bul jobalardyń monıtorıngi, iske asyrý merzimi men tıimdiligi máselelerine úlken kóńil bólinip, talqylandy. Al Qoǵamdyq keńestiń bir otyrysynda basym ınvestısııalyq jobalardyń monıtorıngi qalaı uıymdastyrylatyny, monıtorıng pen baqylaýdyń tıimdiligin arttyrý úshin qandaı ózgerister engiziletini týraly arnaıy másele kóterildi», dedi «Samuryq-Qazyna» AQ Qoǵamdyq keńesiniń tóraǵasy Bolat Jámishev.
Iri jobalardyń júzege asyrylý barysyn baqylap otyrý úshin Qor qurylymynda jobalyq keńse ashyldy. Ol ár apta saıyn tıisti baqylaý júrgizip, eseptik aqparatty Qordyń dırektorlar keńesiniń qaraýyna otyrys saıyn usynatyn bolady. Turaqty negizde taldanyp otyratyn parametrler qatarynda – qurylys alańynda atqarylǵan jumystyń kólemi, joba boıynsha jumystyń oryndalý kestesi, ıgerilgen soma, aptalyq jumys josparynyń atqarylý deńgeıi bar.
«Barlyq joba belgili bir kezeńderge bólingen. Ár kezeńge sáıkes atalǵan joba boıynsha naqty taldaý júrgiziledi. Sonymen qatar biz Qor deńgeıinde sapany qamtamasyz etý turǵysynan da, jumystyń naqty kólemin oryndaý turǵysynan da ınvestısııalyq jobalar tobynyń monıtorıngin jolǵa qoıdyq. Bul qaı tusta aýytqýlar bolýy múmkin ekenin jáne jobany kestege qaıtarý úshin qandaı sharalardy qoldanýǵa bolatynyn túsiný úshin kerek», deıdi Ernat Berdiǵulov.
Onyń aıtýynsha, «Samuryq-Qazyna» AQ-nyń jobalardy qarjylandyrýǵa jumsaǵan shyǵyny 24 trln teńgege jýyq jáne qarjylandyrýdyń ártúrli nysany qoldanylady: qaryz alý, seriktes tabý, menshikti kapıtal quıý jáne basqalar.
«Samuryq-Qazyna» qolǵa alǵan jobalardyń 15-i – energetıka, 7-i – kólik jáne kommýnıkasııa, 10-y – gaz ınfraqurylymy jáne gaz óńdeý, 1-i – munaı hımııa, 5-i – taý-ken jáne hımııa sektorlarynda. Bulardan bólek, taǵy 4 uqsas joba bar.