Jańa apta aıazdy aýa raıymen bastaldy. Mundaı aýa temperatýrasy aldaǵy úsh kúnde Qazaqstanyń birneshe oblysynda saqtalady. Dese de, sary aıazdyń salqyny 14 jeltoqsannan bastap báseńdeıdi, dep jazady Egemen.kz.
Sınoptıkterdiń málimetinshe, 12-13 jeltoqsan kúnderi atmosferada frontaldy aýa massasy ótetindikten elimizdiń shyǵysynda, ońtústiginde jáne ońtústik-shyǵysynda qar jaýady. Al 12 jeltoqsan kúni taýly aımaqtarǵa qalyń qar túsedi.
Qazaqstannyń ońtústigi men shyǵysynda jel kúsheıip, taýly aımaqtarda tuman bolady.
«12-13 jeltoqsanda túnde aýa temperatýrasy soltústik-batysta jáne ortalyqta 25-38 gradýs aıaz, soltústikte 30-38 gradýs aıaz, eldiń qıyr soltústiginde jáne soltústik-batysynda 40-44 gradýs aıaz, respýblıkanyń shyǵysynda 20-38 gradýs aıaz, 14 jeltoqsanda 32-38, jekelegen aýdandarda 40-42 gradýs aıazǵa deıin, ońtústikte jáne ońtústik-shyǵysta aýa temperatýrasy 25-30-ǵa deıin, taýly aýdandarda 33-38 gradýsqa deıin tómendeıdi dep boljanyp otyr.
14 jeltoqsannan bastap Arktıkalyq antısıklon soltústik-shyǵys baǵytqa yǵysa bastaıdy. Antısıklonnyń yǵysýyna baılanysty 14 jeltoqsannan keıin aýa temperatýrasy salystyrmaly túrde jylynyp, túngi ýaqytta aıaz tómendeıdi. Batysta 5-16 aıazǵa deıin, soltústik-batysta 15-35 gradýsqa deıin aıaz, soltústikte 25-38 gradýsqa deıin aıaz bolady», delingen «Qazgıdromet» RMK habarlamasynda.