Atyraýlyq oqýshy Artem Keorkov ár eldiń aqshasyn jınaýdy unatady. Qazir onyń jeke qorynda 80 memlekettiń banknoty bar. О́ıtkeni ol tek Qazaqstannyń ǵana emes, ózge elderdiń aqshalaryn jınaǵan.
Artem Kerokov Atyraý qalasyndaǵy №17 mektep-lıseıiniń 7-synybynda oqıdy. Nýmızmatıkaǵa ańsary aýǵan oqýshynyń qorynda 1993 jyly qoldanysqa engizilgen teńgeniń alǵashqy nusqalary saqtalǵan. Ákesi Sergeı de ár eldiń aqshasyn jınap júr.
«Alǵashqy jınaǵan banknotym – 30 jyl buryn shyǵarylǵan 100 teńge. Bul banknotta qazaq hany – Abylaıdyń portreti beınelengen. Ony ákem týǵan kúnime syılaǵan edi. Sol sebepten ony eń qymbat banknot dep esepteımin. Sodan beri ár eldiń aqshasyn jınaı bastadym. Qazaqtyń uly tulǵalalary Shoqan Ýálıhanov, Abaı Qunanbaıuly, Qurmanǵazy Saǵyrbaıuly, Súıinbaı Aronuly, Ábilqaıyr han beınelengen teńgeler, Eýropa, Afrıka, Ońtústik Afrıka, onyń ishinde Trınıdad jáne Tobago, Erıterııa, Djıbýtı sekildi 80 memlekettiń banknotyn jınadym», deıdi Artem Keorkov.
Ol bos ýaqytyn ózi jınaǵan aqshalardy zertteýge arnaıdy. О́ıtkeni valıýtasynan ár eldiń tarıhy men mádenıetinen, tipti tabıǵatynan aqparat alýǵa bolady.
«Bárinen elimizdiń ulttyq valıýtasy – teńgeniń jóni bólek. Teńgeniń dızaınyn unatamyn. Ákem ekeýmiz shaǵyn kórme uıymdastyryp, qatysýshylarǵa teńgeniń tarıhy, qundylyǵy týraly áńgimeleımiz. Elimizdiń ár óńirinde monetalarmen almasatyn dostarym bar», deıdi Artem Keorkov.
Atyraý oblysy