Nuralı Amangeldıev Borodýlıha aýdany Jezkent kenti mektep-lıseıiniń 8-synybynda oqıdy. Jańalyqqa jany qushtar jas óren jaqynda sybaılas jemqorlyqqa qarsy oı qalyptastyratyn «Satylmaıtyn Alpamys» atty kompıýterlik oıyn jobasyn ázirlep, jurtty eleń etkizdi.
Nuralı osy jumysyn alǵash ret uıymdastyrylǵan sybaılas jemqorlyqqa qarsy jobalardyń I respýblıkalyq baıqaýyna usynǵany sol, oqýshynyń erekshe jobasy úzdik baǵalanyp, «Sybaılas jemqorlyqqa qarsy medıaquraldar» baǵyty boıynsha 1 mln teńge kóleminde aqshalaı syılyqpen marapattaldy. Balańdyǵyna qaramaı, qoǵamdyq kereǵar qubylysty tejeý úshin ter tókken eńbeginiń esh ketpegenin bildirse kerek.
Aldymen aıtaıyq, Nuralıdiń jańa oıyn jobasyna jetekshilik etken anasy Natalıa Gennadıevna ınformatıka páninen atalǵan bilim oshaǵynda qazaq jáne orys tilderinde sabaq beredi. Alǵashynda «jaqsyny kórmekke» degendeı, joba avtorynyń ózimen tildespek bolyp ákesine qońyraý shalǵanymyzda, onyń «Baldáýren» demalys lagerinde ekenin estidik. Ákesi Almatyda jumys babymen júrgenin, múmkindik bolsa, anasy Natalıamen habarlasýdy surap, «qazaqshasy menen jaqsy» dep ázildep qoıdy. Degenmen ázil bolǵanymen, shyndyǵynda solaı eken. Natalıa Elýbaevany ulynyń jeńisimen quttyqtaǵanymyz sol, áńgime tıegin qazaqsha aǵytyp qoıa berdi.
«Nuralıdiń bul jobasyn «Satylmaıtyn Alpamys» dep ataýynyń da óz mánisi bar. Bárimizge belgili «Alpamys mektepke barady» degen kınony ol da únemi qyzyǵyp kóretin. Jasaǵan jobasynyń negizgi ıdeıasy – bilim alýshylardyń boıynda sybaılas jemqorlyqqa qarsy minez-qulyq daǵdylaryn, kúndelikti ómirde sybaılas jemqorlyq kórinisterine tózbeýshilikti qalyptastyrý. Sony júzege asyrýdaǵy oılaryn osy fılmnen tapty», deıdi N.Elýbaeva.
Sybaılas jemqorlyqqa qarsy oıyn elimizdegi sybaılas jemqorlyqtyń naqty jaǵdaılary negizinde kórkem shyǵarma formatynda ázirlengen, bul oıynshyǵa atalǵan máseleniń saldaryn tereńirek túsinýge kómektesedi. Ár epızodtyń sońynda oıynshyǵa Qylmystyq kodekske túsinikteme beriledi. Oıynnyń sońǵy mıssııasy – sybaılas jemqorlyqqa qarsy is-qımyl týraly zańnama salasyndaǵy bilimin osy bastan keńeıte túsý. Oıynnyń sońynda kóp upaı jınaǵan oıynshy jeńimpaz atanady.
Kompıýterlik oıyndy mektepte orta jáne joǵary býyn oqýshylaryna oınatyp, tájirıbe jasap kórgen. Sondaı-aq Shyǵys Qazaqstan oblystyq Sybaılas jemqorlyqqa qarsy is-qımyl departamenti uıymdastyrǵan О́skemen qalasyndaǵy «Úmit» balalar lageriniń tárbıelenýshileri de qyzyǵa oınapty.
Jetekshisiniń aıtýynsha, Nuralı oıyndy vırtýaldy shyndyqty paıdalanýǵa beıimdeýdi josparlap otyr. Bul ózgerister oıynǵa degen qyzyǵýshylyqty odan ári arttyrady. Sonymen qatar oıynnyń qoljetimdiligin arttyrý jáne keń aýdıtorııa tartý úshin ony memlekettik tilge aýdarýdy da qolǵa almaq. Onyń bul maqsatyna Aıagóz aýdany Myńbulaq aýylynda týyp, Aqsháýli aýylynan túlep ushqan anasy Natalıa Gennadıevna qýana qoldaý kórseteri sózsiz. О́ıtkeni Jezkenttegi bilim oshaǵynda dáris berip júrgen ustaz patrıottyq turǵyda qazaq tiline ár kez qurmetpen qaraıtynyn shynaıy rızashylyǵymen jetkizdi.
Abaı oblysy