Qostanaıda aqyn-sazger, kezinde Ybyraıdyń aǵartýshylyq ıdeıasyn kópke nasıhattap, Alash zııalylarynyń el ishine jańasha ilim-bilim jaıýyna úlken qoldaý kórsetken Nurjan Naýshabaıuly atyndaǵy respýblıkalyq jyr-terme, dástúrli án oryndaýshylarynyń baıqaýy óz máresine jetti.
Oblystyq mádenıet basqarmasy uıymdastyrǵan dástúrli óner baıqaýyna elimizdiń ár óńirinen kelgen ónerpazdar qatysty. Kileń kúmis kómeı ánshiler bas qosqan dástúrli án merekesinde Nurjannyń buryn kóp aıtylmaı kelgen «Kóken-aı», «Bátımaǵa», «Ara-aı», «Asyl-aı», «Jan sáýlem», «Nazym», «Zaman qalpy», «Muqıdash-aı», «Ulaǵat», «Neshe safl, neshe bap» atty shyǵarmalary áýeledi. Baıqaýǵa qatysqan jyrshy-termeshiler Nurjannyń nazymdary men ánderin oryndaýmen qatar, burynnan ózderiniń án qorjynynda júrgen mýzykalyq shyǵarmalaryn shyrqap, kórermen qaýymnyń qulaq quryshyn qandyrdy.
Dástúrli jyrshy-termeshilerdiń ónerin áıgili jyrshy, folklor zertteýshi Almasbek Almatov bastaǵan qazylar alqasy tarazylap otyrdy.
Topjarǵan aqyn Nurhan Ahmetbekov dóp basyp baǵa berip:
Qazaqta Naýshabaıdyń Nurjany ótken,
Arqaǵa án tuqymyn sol edi ekken.
Tobyldan kóterilgen bir zor aıqaı
Sibir men Syr sýyna balyn tókken, dep jyryna arqaý etken Nurjan ánderi – Arqanyń pań dalasyndaı minezdi, yrǵaǵy asaý, ishki ıirimge baı, shoqtyǵy bıik týyndylar.
Dástúrli óner merekesi máresine jetkende alys-jaqynnan arnaıy kelgen ónerpazdardyń bárine qurmet kórsetilip, Nurjan ánderi baıqaýynyń arnaıy músinshesi men aqshalaı syılyqtar tabys etildi.
Qostanaı oblysy