Qostanaıdaǵy Jastar saraıynda «Túrki álemi» halyqaralyq etnofestıvali ótti. Baýyrlas elderdiń arasyndaǵy mádenı baılanystyń bekı túsýine septigi mol dástúrli is-sharaǵa Qostanaı oblysynyń ónerpazdary, О́zbekstan, Qyrǵyzstan jáne Bashqurtstan Respýblıkasynan kelgen óner ujymdary qatysty.
Jalpy, «Túrki álemi» festıvalin alǵash uıymdastyryp, jón-josyǵyn kórsetip jolǵa qoıyp ketken talantty kúıshi, Qostanaıdaǵy qazaq orkestriniń negizin qalap, quramyn qalyptastyrǵan marqum Nazymbek Moldahmetov edi. Túbi bir túrki halyqtaryna ortaq óner merekesi sodan beri úzilmeı jalǵasyp keledi.
Festıval aıasynda Bashqurtstannyń «Dert», Qyrǵyzstannyń «Kúú býlak», О́zbekstannyń «Taranným» ansamblderiniń jetekshileri, sonymen qatar О́zbekstannyń halyq ártisi, dırıjer Farýh Sadyqov qatysqan jıyn ótti. Meımandar festıvaldyń mán-mańyzyn, ereksheligin tilge tıek etip, uıymdastyrýshylarǵa rızashylyq bildirdi.
«Qazaqtyń ulttyq mýzykasy óte baı. Bul elde halyqaralyq deńgeıde ótetin baıqaý-festıvaldar óte kóp. Sonysymen kóbimizge úlgi. Onyń ishinde jyl saıyn Qostanaıda ótip turatyn «Túrki álemi» festıvali men Dırıjerler forýmyn erekshe atap óter edim. Qostanaı oblystyq fılarmonııasynan ózge fılarmonııalardyń eshqaısysynda mundaı keń aýqymdy jobalar joq desem, qatelespeımin. Sizder uıymdastyryp jatqan is-sharalar bizdiń elde de belgili bola bastady. Bul – túrkitildes aǵaıyndar úshin asa mańyzdy jáne kerek festıval. Álde de jandana, jetilip, damı túsýin tileımin», deıdi ózbekstandyq meıman Farýh Sadyqov.
«Dert» ansambliniń jetekshisi Emır Aýbakırov te Qazaqstanda ótetin halyqaralyq óner baıqaýlaryna múmkindiginshe qalmaı qatysyp turady eken. «Bashqurt baýyrlaryn umytpaı, únemi shaqyrý jiberip otyratyn uıymdastyrýshylarǵa, baýyrlas aǵaıynǵa alǵysymyz sheksiz. Bul festıvaldyń jyldan-jylǵa bedeli artyp kele jatqanyn kózben kórip otyrmyz. Qazaqstanǵa kelgen saıyn jergilikti jurttyń ystyq yqylasyn sezinip, óz elimizge erekshe shabytpen qanattanyp qaıtamyz. Osydan-aq túrkitildes elder mádenıetiniń bir-birine jattyǵy joq ekenin, tamyrlastyǵyn ańǵaramyz. Aldaǵy ýaqytta aýqymy keńeıe bersin dep tileımiz», deıdi E.Aýbakırov.
О́z kezeginde qyrǵyz elinen kelgen Dastan Bórónqulov ta «Túrki álemi» festıvaliniń kórkemdigi, ereksheligi, mazmuny, sondaı-aq aldaǵy josparlary týraly oıyn ortaǵa saldy.
Festıval shymyldyǵyn Qostanaı oblystyq fılarmonııasynyń «Aqjeleń» ansambli ashyp berdi. О́ner ujymynyń súıemeldeýimen sahnaǵa saıyn dalanyń salqar keńdigin syıdyryp jibergendeı bolǵan jergilikti dástúrli ánshi Manapbek Qadirov te Nurjannyń nazymdaryn naqyshyna keltire oryndap berdi. Bishkek qalasynan kelgen «Kúú býlak» ansambliniń óneri de tyńdarmandy beıjaı qaldyrmaı, birden baýrap aldy. Áýeli áıgili «Manas» jyrynan úzindi oryndalyp, keıin ulttyq kúıleri, áýezdi, áserli ánderi sahnany jańǵyryqtyryp jiberdi. Al bashqurtstandyq «Dert» ansambliniń oryndaýyndaǵy syrly saz ıirimderi kórermendi tipten bólekshe sezimge bóledi. Koraı aspabynyń sheberleri shynymen de túrki áleminiń qatparly ǵasyrlaryna sapar shektirgendeı boldy. Ánshiliktiń «kómeımen aıtý» tehnıkasynyń úzdik úlgisin de kórsetti. О́zderiniń dástúrlerine saı baǵdarlamalarynyń ortasynda bir koraıdy kórermenderdiń birine syıǵa tartty.
Uıymdastyrýshylar alys-jaqynnan kelgen meımandardyń usynys-tilegi boıynsha joldyń qashyqtyǵy eskerile otyryp, aldaǵy ýaqytta dástúrli festıval ótetin ýaqytty basqa mezgilge aýystyrý máselesi qarastyrylatynyn aıtty.
Qostanaı oblysy