Bıyl Qazaq televızııasynyń qurylǵanyna 65 jyl toldy. Osy aralyqta qazaq dıktorlarynyń ulttyq mektebi qalyptasty. Máselen, tuńǵysh dıktor Zulqııa Jumatovadan bastap Lázıza Aımasheva, Orynbala Orazbaeva, Lásker Seıitov, Marıam Aıymbetova, Qajy Qorǵanov, Tynys О́tebaev sekildi aǵa-apalarymyz atalǵan mekteptiń qalyptasýyna zor úles qosty. Bala kúnimizde bul dıktorlardyń shet jaǵasyn teledıdardan biz de kórdik. Daýystary qandaı ásem, tunyq edi. Osy aıtýly tulǵalardyń izin basyp, óz mamandyǵynyń mereıin asyrǵan daraboz dıktordyń biri – Ábdiráli Bólebaı.
Tanymal dıktordy 90-jyldardyń kórermeni jappaı bildi desek, artyq aıtpaımyz. Ol kisiniń teledıdardan únemi kúlimsirep turatyn meıirimdi júzin kórgende kók jáshiktiń ishinen týǵan aǵamyzdy kórgendeı máz bolatynbyz. Qońyr daýsy qandaı keremet edi. Ony estigen saıyn tas bulaqtyń sýyn ishkendeı meıirlenesiń. Qazaqtyń uǵymǵa aýyr sózderiniń ózin tigisin jatqyzyp, anyq aıtatyn. Túsinikti jetkizetin. Buǵan onyń aldymen ata-anadan daryǵan talanty, ekinshiden, Qurmanǵazy atyndaǵy konservatorııanyń teatr bóliminde oqyǵany sebep bolsa kerek. О́ıtkeni ol munda ataqty rejısser Asqar Toqpanovtan tálim alyp, sonyń shákirti boldy. Sózdiń salmaǵy men qadirin túsindi. Biraq ol alǵashqy eńbek jolyn teatrda emes, «Qazaqfılm» kınostýdııasynda rejısserdiń kómekshisi bolyp bastady.
70-jyldardyń ortasynda Qazaq KSR memlekettik teleradıo komıteti dıktorlarǵa konkýrs jarııalaıdy. Oǵan 100-ge jýyq jas qatysyp, sonyń ishinen Ábdiráli aǵamyz top jaryp, «Qazaq» radıosyna dıktor bolyp ornalasady. Osynda ataqty dıktorlar – Ánýarbek Baıjanbaev, Omarhan Qalmyrzaev, Bolat Bijibaev sekildi tarlandardan osy mamandyqtyń qyr-syryn úırenip, kóp ónege aldy. Qazaqy qońyr daýsymen tyńdarmandarǵa tanyldy. 1985 jyldan bastap televızııaǵa aýysyp, qazirgi ulttyq arnada dıktor bolyp istedi. Biz keıde dıktorlyqty teledıdardyń aldyna sylanyp-sıpanyp shyǵyp, bireýdiń jazyp bergenin oqyp berý dep túsinemiz. Negizi olaı emes. Mıllıondaǵan kórermenniń aldynda turyp sóıleý, jańalyq oqý – úlken jaýapkershilik. Osy synnan súrinbeı ótkenniń biri – Á.Bólebaı. Ol 1992-1996 jyldary atalǵan arnada dıktorlar tobynyń jetekshisi bolyp, qanshama shákirt tárbıeledi. О́z aldyna dıktorlyq mektep qalyptastyrdy.
Ábdiráli aǵamyzdy jaqyn biletinder onyń azamattyǵyn, adaldyǵyn, kishipeıildiligin, mádenıettiligin, bekzattyǵyn aldymen aýyzǵa alady. Qazaq radıosynda uzaq jyl qanattasyp eńbek etken belgili jýrnalıst Qoshan Mustafauly onyń «ózime ǵana bolsyn» demeıtin kóńili darqan azamat bolǵanyn aıtady.
«Ábekeń minezi jaısań jigit edi. Bireýge qatty sóz aıtyp, renjitip kórgen emes. Aqkóılek, aqkóńil jan bolatyn. Oǵan qandaı maqtaý aıtsań da jarasady. О́zi tálimin alǵan aǵalarynyń esimin aýzynan tastamaı aıtyp júretin. Ertede televızııada jańalyqtar júrgizip otyryp, bir kisiniń aty-jónin qate aıtyp qoıady. Sony kórgen dıktor aǵasy Bolat Bijibaev sol mezette qońyraý shalyp: «Ábdiráli seniń famılııańdy «Bóle-baev» dep bólip aıtsam qalaı bolady?» degende, betimnen otym shyǵyp, eki-úsh kún qınalyp júrdim. Aýyryp qala jazdadym», dep aıtqany bar edi. О́zi de jas dıktorlardyń aıaq alysyn únemi baqylap otyratyn. Olardyń bireýi sózdi qate aıtsa, soǵan jany kúıip, mazasyzdanatyn. Bir kúni ekeýmiz «Qazmedıa» ortalyǵynyń aldynda tur edik. Syrttan 6-7-synyptarda oqıtyn mektep oqýshylary kele jatty. Olardy qarsy alyp turǵan jas jigit butyna jyrtyq djınsı kıip alypty. Ábekeń sony kórip, álgi jigitti bylaı shaqyryp aldy da: «Qarashy, ana súp-súıkimdi balalar «Qazaqstan» ulttyq arnasyna keldik dep tóbeleri kókke jetpeı qýanyp tur. Al sen oqýshylardy jyrtyq shalbarmen kútip alyp tursyń. Uıat qaıda?» dep aıtyp saldy. Ábekeńniń ózi sándi kıinip, jarqyrap, jadyrap júretin edi ǵoı», deıdi saǵynyshpen eske alyp.
1996-2000 jyldary ol kisi «Habar» agenttiginde «Jańalyqtar» bólimi men «Jeti kún» aqparattyq-saraptamalyq baǵdarlamasynyń júrgizýshisi bolyp istedi. Osy jyldary «Jeti kún» baǵdarlamasyn jurtshylyq qyzyǵyp kóretin. Onda kóterilgen problemalar aıaqsyz qalmaıtyn. Sol mezette sheshilip jatatyn. Odan keıin Qarjy polısııasynyń baspasóz hatshylyǵyna taǵaıyndaldy. Bul qyzmetti de abyroımen atqardy. Qanshama adamǵa qamqorlyǵy tıdi. Ol qandaı qyzmet atqarsa da, jýrnalısterge bir búıregi buryp turatyn. Qolynan kelgenshe solarǵa qoldaý kórsetip, járdemesetin. 2015 jyldan bastap, ómiriniń sońyna deıin Qazaq radıosynda eńbek etti.
Radıojýrnalıst Janat Januzaquly onyń Qazaq radıosynyń ǵasyrlyq toıy qarsańynda «Ǵızzat ǵumyr» atty habar júrgizip, sonda radıonyń júz jyldyq tarıhyna sholý jasap, osynda qyzmet istegen maıtalman azamattar týraly 100-den asa taǵylymdy habar jasaǵanyn jetkizdi.
«Ábdiráli aǵa ekeýmiz birlesip, «Darıǵa dáýren», «El aǵalary», «Káýsar» atty 200-ge jýyq habar daıyndadyq. Ol kisi ómirdiń aǵysymen aǵa bermeıtin, óz arnasyn, baǵasyn biletin azamat edi. Jastarǵa jaqyn júrdi. Sol arqyly jan dúnıesindegi rýhanı ańsardy qandyra bildi», dep eske alady áriptesi.
Ol qyzmette ǵana emes, otbasynyń da uıtqysy bola bilgen. Balalary men nemereleri dese, jany shyǵyp turatyn azamat bolǵan. Aǵanyń asyl jary Baıan Ábdiqyzy onyń óte meıirimdi bolǵanyn aıtty.
«Ábdiráliniń júregi óte názik, meıirimge shúpildep tolyp turatyn. Kóshede jylap turǵan bala kórse, sony jubatyp, jany qalmaıtyn. О́zi de adal ómir súrdi. Balalaryn da adal azamat etip tárbıeledi. Biz 1975 jyly shańyraq kóterdik. Ekeýmiz de sońǵy kýrsta oqıtynbyz. Ata-anasy qarapaıym kisiler edi. Ákesi 40 jyldan astam ýaqyt muǵalim bolyp istegen. Bilim berý salasynyń úzdik qyzmetkeri. Ata-anasyn óte jaqsy kórdi. Meniń áke-sheshemdi de erekshe syılady. Jalpy, jasy úlken kisilerge, qarııalarǵa qurmeti bólek-tuǵyn. Anasy 49 jasynda ómirden ótken. О́zi elge tanymal, abyroıly azamat bolǵanyn anasy kóre almaǵanyn ókinishpen aıtyp otyratyn. Ekeýmiz elý jylǵa jýyq tatý-tátti ǵumyr keshtik. Balalarymyz ómirge keldi. Olardy ósirdik. Odan keıin nemerelerimiz týdy. Endi solardyń qyzyǵyn birge kóremiz dep júrgende aramyzdan ketip qaldy... Saǵynamyn. Únemi kúlimsirep turatyn beınesi kóz aldymda turady», deıdi Baıan apaı.
Keshe kólikte kele jatyp, Qazaq radıosynyń «Altyn qorynan» Ábdiráli aǵamyz júrgizgen bir tanymdyq habardy berdi. Aǵanyń janǵa jaıly qońyr daýsy estilgende ol kisi áli aramyzda júrgendeı kórindi. Tiri bolsa, jotaly 70 jasqa tolar edi. Osyndaıda oıymyzǵa Abaı atamyzdyń «О́ldi deýge bola ma, oılańdarshy, О́lmeı-tuǵyn artyna sóz qaldyrǵan», degen óleń joly túsedi. О́lmeı-tuǵyn artyna úni qalǵan Ábdiráli Bólebaı halqymen birge jasaı beredi.