Qatty boran, jaýyn-shashyn, kóktaıǵaq saldarlarynan respýblıkalyq, oblystyq mańyzy bar avtojoldardaǵy kóliktiń barlyq túrlerine qozǵalys shektelgen ótken táýlikte TJM qutqarýshylary jol qyzmetteri men ishki ister organdary jáne jergilikti atqarýshy organdar qyzmetkerlerimen birlesip qar qursaýynan 106 adamdy, onyń ishinde 6 balany qutqarǵan. Oǵan qosa 223 adam, onyń ishinde 4 bala evakýsııalandy, dep habarlaıdy Egemen.kz.
TJM baspasóz qyzmetiniń málimetinshe, Qostanaı oblysy aýmaǵynda respýblıkalyq, oblystyq jáne jergilikti mańyzy bar joldardyń jabyq ýchaskelerinde qar qursaýynda qalǵan jeńil kólikterden 37 adam taqaý mańdaǵy eldi mekenderge jetkizilgen.
Týra solaı, Aqmola oblysynan 13 adam jáne Soltústik Qazaqstan oblysynan 27 adam, onyń ishinde 3 bala jaqyn eldi mekenderge jetkizildi.
Sonymen qatar Aqtóbe oblysynda izdestirilgen 2 shopan aman-esen tabylǵan.