Astana, Almaty qalalaryndaǵy Qarýly kúshterdiń áskerı qyzmetshileri ekinshi dúnıejúzilik soǵystyń ardagerlerin kele jatqan Jańa jylmen quttyqtady. Astanada Qorǵanys mınıstrligi ókilderi «Qarýly kúshterdiń ardagerleri» respýblıkalyq qoǵamdyq birlestigimen birlesip eki maıdangerge bardy. Astana qalasy qorǵanys isteri jónindegi departament ókili zapastaǵy polkovnık Ǵanı Artyqov osy kúnderi elordada ekinshi dúnıejúzilik soǵysyna qatysqan 7 ardager turatynyn, jyl ótken saıyn maıdangerler azaıyp bara jatqanyn, ár ardager – tiri tarıh ekenin, jeńistiń ońaı kelmegenin óskeleń urpaq bilý kerektigin atap ótti. Sonymen qatar Almaty áskerı qyzmetshileri maıdangerdiń úıine bardy, dep habarlaıdy Egemen.kz mınıstrlik saıtyna silteme jasap.
Astana áskerı qyzmetshileri úıine barǵan Rzaǵul Baıkeshev 1923 jyly 18 qazanda Aqtóbe oblysyna qarasty Muǵaljar aýdanynda dúnıege kelgen. Rjev shaıqasyna, Velıkolýkskige shabýyldaý operasııasyna, Polshany, Rýmynııany, Vengrııany azat etý shaıqastaryna qatysqan, túrli ordendermen jáne medaldarmen marapattalǵan. Soǵystan keıin ol Rojdestvenka sovhozynda ekspedıtor bolyp jumys istep, 1983 jyly zeınetke shyqqan.
Áskerı qyzmetshiler Raısa Safonıcheva turatyn elordalyq qarttar men múgedekterge arnalǵan medısınalyq-áleýmettik mekemege bardy. Ol 1925 jyly 10 shildede Bashqurt ASSR, Tashkent aýdany, Shınchıakkýl aýylynda dúnıege kelgen. 1944 jyly naýryz aıynda Gorkıı qalasyndaǵy Sormov aýdandyq áskerı komıssarıatynan maıdanǵa óz erki boıynsha shaqyrylǵan. Mınsk qalasynda qysqa merzimdik baılanys kýrsyn támamdap, ekinshi Ýkraına maıdanyna jiberilgen. Kıev, Bessarabııa, Rýmynııa, Vengrııa úshin bolǵan shaıqastarǵa qatysyp, jeńisti Býdapesht mańynda qarsy aldy. Ordendermen hám medaldarmen marapattalǵan. Soǵystan keıin 1946 jyly Reseıge oralǵan ony komsomoldyq joldamamen Tyń jerlerdi ıgerý úshin Qazaqstanǵa jiberedi. Jambyl geologııalyq barlaý ekspedısııasynda aspaz bolyp jumys istedi. Zeınetke shyqqannan keıin de qoǵamdyq jumystarǵa belsene qatysyp, qalalyq ardagerler keńesiniń múshesi boldy.
Qorǵanys vedomstvosynyń ókilderi Rzaǵul Baıkeshev pen Raısa Safonıchevany quttyqtap, Jeńistiń 80 jyldyǵyn jaýyngerlik rýhta aman-esen qarsy alýlaryna tilekshilik bildirdi, gúlder, estelik syılyqtar tabystady. Olarǵa Ulttyq áskerı-patrıottyq ortalyǵy Ortalyq áskerı ansambli mýzykanttary soǵys jyldaryndaǵy ánderdi oryndap berdi. О́z kezekterinde ardagerler áskerı qyzmetshilerge beıbitshilik, amandyq, qyzmette tabys tiledi.
Almaty qalasynda da Desanttyq-shabýyldaý áskerleriniń áskerı qyzmetshileri men materıaldyq qamtamasyz etý polkiniń otbasymen jumysty uıymdastyrý qyzmetiniń ókilderi ekinshi dúnıejúzilik soǵysynyń ardageri Egor Dolıdýdany 96 jasqa tolǵan týǵan kúnimen jáne Jańa jylmen quttyqtady.
Ol da sibirlik, Krasnoıarsk ólkesiniń týmasy. 1944 jyly jeltoqsanda pýlemetshi atqysh retinde maıdanǵa shaqyrylǵan. Qıyr Shyǵystaǵy 184 dıvızııanyń 297 atqyshtar polkinde qyzmet etken ol jeńisti Japonııa shekarasynda qarsy alǵan. Soǵystan keıin maıdanger Qazaqstanǵa keledi. Ishki ister mınıstrliginde jáne áskerılendirilgen órt sóndirý bóliminde jumys istedi. Egor Dolıdýda 1983 jyly maıor shenimen otstavkaǵa shyqty.
Ardager desantshylardyń iltıpattaryna rızashylyǵyn aıta kele, ózi ótken maıdan joly, odan keıingi qyzmeti týraly áńgimelep, súıikti ánin de shyrqap berdi.