Memleket basshysy Qasym-Jomart Toqaev kólik-logıstıkalyq áleýetti damytýdy Úkimet jumysynyń negizgi basymdyqtarynyń biri retinde belgiledi. Bul tapsyrmany oryndaý sharasy tııanaqty júrgizilip keledi.
2024-2030 jyldar aralyǵynda jalpy uzyndyǵy 9 myń shaqyrymnan asatyn birqatar basym jol jobalaryn júzege asyrý josparlanǵan. Onyń 4,7 myń shaqyrymy respýblıkalyq jelide, 4,5 myń shaqyrymy oblystyq mańyzy bar joldarda. Respýblıkalyq baǵyttarǵa keletin bolsaq, bıylǵy jyly «Aqtóbe – Ulǵaısyn – Qyzylorda», «Qaraǵandy – Jezqazǵan», «Saryaǵash aınalma joly», jobalary boıynsha jumystardy bastaý josparlanǵan. «Qyzylorda – Jezqazǵan» baǵyty boıynsha bastalǵan jumystar jalǵasady.
Elimizdiń teńiz ınfraqurylymyn damytý úshin bıylǵa birqatar mańyzdy jobalar pysyqtaldy. Aqtaý portynda konteınerlik hab qurý, aılaqtardy rekonstrýksııalaý, sondaı-aq júk tıeý jabdyqtaryn jańartý josparlanyp otyr. Byltyr Quryq portynda Abu Dhabi Ports kompanııasymen birlesken astyq termınaly iske qosyldy. Endi teńizdegi qaýipsizdikti arttyrý úshin 2024-2025 jyldary Aqtaý jáne Quryq porttarynyń akvatorııalarynda tereńdetý jumystary júrgiziledi.
Atalǵan jobalardyń barlyǵy júzege assa, Qazaqstan teńiz porttarynyń ótkizý qabiletin 10 mln tonnaǵa, onyń ishinde konteınerlik qýattylyqty jylyna 300 myń JFB-ǵa deıin arttyrýǵa múmkindik týady. Al byltyr ishki sý kóligin damytý kúsheıtildi. Endi transshekaralyq Ertis ózeniniń tranzıttik áleýetin arttyryp, Reseı – Qazaqstan – Qytaı jańa dálizin qurý josparlanyp jatyr. Áńgime Semeı qalasynda jańa júk tasymaly shlıýzi, Tuǵyl aýylyndaǵy ózen porty jáne Qytaı shekarasyna deıin temirjol salý týraly bolyp otyr. Transshekaralyq Ertis ózeniniń tranzıttik múmkindikterin damytý júk tasymaldaý kólemin qazirgi 1,5 mln tonnadan 3,5 mln tonnaǵa deıin arttyrady degen úmit bar.
Avıasııa salasynda qazirgi kúnde jeke ınvestısııa esebinen Shymkent, Qyzylorda jáne Almaty qalalarynda 3 jańa jolaýshylar termınaly salynyp jatyr. Olardyń paıdalanýǵa deıingi barlyq jumys osy jyly aıaqtalyp, halyqqa qyzmet kórsetýdi bastaıdy.
Logıstıkalyq qyzmetti jaqsartý maqsatynda THKB arqyly ótetin tasymaldar úshin «bir tereze» qurý máselesi pysyqtalyp jatyr. Sıfrlyq kólik dálizin tolyq iske qosý 2024 jylǵa josparlanǵan. Este bolsa, byltyr Qytaımen THKB damytý týraly kelisimderge qol qoıyldy. Olar eksporttyq-ımporttyq jáne tranzıttik tasymaldardy ulǵaıtýdy, QHR-ǵa porttyq ınfraqurylymdyq jobalardy qarjylandyrýǵa kómek kórsetýdi, THKB boıyndaǵy mýltımodaldy tasymaldy damytýdy jáne t. b. kózdeıdi.
Aqtaý jáne Quryq porttaryna júkterdi avtomobılmen jetkizý ýaqytyn qysqartý úshin uzyndyǵy 515 km bolatyn respýblıkalyq mańyzy bar «Shalqar – Beıneý» avtojolyn salý josparlanǵan. Qazir tehnıkalyq-ekonomıkalyq negizdemesi ázirlenip jatyr. Baǵytty damytý boıynsha sharalardy júzege asyrý onyń ótkizý qabiletin 2027 jylǵa qaraı jylyna 10 mln tonnaǵa deıin arttyrýǵa múmkindik beredi.
Rekonstrýksııalaý nátıjesinde ótkizý pýnktteriniń aýmaqtaryn keńeıtýdi, qoldanystaǵy ǵımarattar men qurylymdardy jańǵyrtýdy, zamanaýı jabdyqtarmen qamtamasyz etý, onda stasıonarlyq ınspeksııalyq tekserý keshenderin, sondaı-aq pasporttyq baqylaý kabınalary men bólingen qozǵalys jolaqtarynyń sanyn kóbeıtý qarastyrylǵan. О́tkizý pýnktterinde avtomattandyrý men ozyq tehnologııalardy engizý úshin 2024-2026 jyldary 83 birlik «E Gate» pasporttyq baqylaýdyń avtomattandyrylǵan júıesin satyp alý josparlanǵan.