Qys maýsymynyń qıyndyǵy

Respýblıkalyq mańyzy bar avtojoldardy qysqy jaǵdaıda kútip-ustaý úshin úlken kúsh jumyldyrylady. Jalpy uzyndyǵy 25 myń shaqyrymǵa jýyqtaıtyn respýblıkalyq mańyzy bar avtojoldar qaharly qys maýsymyndaǵy kútimmen tolyq qamtylǵan. Onyń 21 myń shaqyrymyn «QazAvtoJol» ulttyq operatory óz baqylaýynda ustap otyrsa, 4 myń shaqyrymyn merdigerlik uıymdar aýyspaly qaıta jańartý jáne kúrdeli jóndeý nysandarynda tıisti jumystaryn kúndelikti atqaryp keledi.

Bıylǵy qys aılaryna 515 óndiristik baza daıyndalǵan eken. Onyń 121-i – tótenshe jaǵdaılar týyndaǵan kezde qajetti jumystardy uıymdastyrýǵa arnalǵan jylytý pýnktteri. Bularmen birge 182 garaj ben avtoturaq, sondaı-aq 91 materıaldyq qoıma tolyqtaı daıyn­dyqqa keltirilgen.

О́ndiristik bazalarda kóktaıǵaqqa qarsy materıaldardyń qajetti mólsheri bar. Olar aıazdy ári borandy maýsymǵa jetkilikti. Atap aıtqanda, kún saıyn kútip-ustaý jáne kóktaı­ǵaqqa qarsy paıdalanylatyn 94 myń tekshe metr qum, 26 myń tonna tuz, 33 myń tekshe metr sebindi, 25 myń tekshe metr qum-tuz qospasy jáne 800 tonna hımııalyq reagent paıdalanýǵa daıyn tur.

Negizi avtojoldardy qysta kútip-ustaý úshin 1 114 birlik qar tazalaý tehnıkasy daıyn tur. Muny­men birge kútpegen qıyndyqtar týyp, tótenshe jaǵdaı oryn alsa, jaldaý negizinde qosymsha 118 birlik tehnıka taǵy da qosymsha tartylady.

Joldyń tehnıka parkin meılinshe jaraqtan­dyrý úshin «QazAvtoJol» ulttyq operatorymen 379 birlik jańa jol-paıdalaný tehnıkasy satyp alyndy («О́DQ» AQ kredıtteý esebinen 245 birlik, amortızasııalyq aýdarymdar esebinen 109 birlik jáne jol aqysy esebinen 25 birlik), onyń ishinde aǵymdaǵy qysqy kezeńde iske qosylatyn 346 qar tazalaý tehnıkasy bar.

Qar basatyn ýchaskelerdiń jalpy uzyndyǵy – 2,7 myń shaqyrym. Qar ustaý maqsatynda eń kóp qar basatyn ýchaskelerde 364 kılometrlik stasıonarlyq qorshaýlar ornatyldy. Sonymen qatar qysqy kútim aıasynda 4 328 dana ýaqytsha jol belgileri (taıǵaq jol, maksımaldy jyldam­dyqty shekteý) jáne qajetti tustarǵa ýaqytsha qar ustaıtyn qalqandar turǵyzylǵan.

Qys maýsymy bastalmaı turyp oblystyq fılıaldardyń jaýapty basshylary men qyzmetkerleri («QazAvtoJol» UK» AQ jáne «QAJservıs» JShS) jáne qajetti tehnıka sany (shamamen 500 birlik) bekitilgeni belgili. Al oryn alǵan jaǵdaıdy únemi monıtorıngteý jáne baǵalaý úshin Kólik mınıstrliginiń táýlik boıǵy ahýaldyq ortalyǵy jáne «QazAvtoJol» ulttyq operatorynyń 1 403 dıspetcherlik qyzmeti jumys istep tur.

Shtattan tys jaǵdaılarda jedel áreket etý úshin, jol paıdalanýshylarynyń qatysýymen tanymal messendjerlerde, telegram arnalarynda, Whatsapp toptary qurylǵan. Kez kelgen jaǵdaıda qıyndyqqa tap bolǵan árbir azamat osynaý tıimdi qyzmetti paıdalana alady. Iаǵnı 1403 jol qyzmetine júgingen kezde avtokólik quraldaryna tıisti kómek kórsetý boıynsha dereý sharalar qabyldanady.

Sondaı-aq TJD jáne ákimshilik polısııa bólimshelerimen úılesimdi ózara is-qımyl qamtamasyz etildi jáne qozǵalysty ýaqytsha shekteý qaǵıdalaryna jáne tótenshe jaǵdaılar kezindegi ózara is-qımyl algorıtmine sáıkes qolaısyz aýa raıy jaǵdaılarynda birlesken sharalar («QazAvtoJol» UK» AQ, TJD, PD jáne «QAJservıs» JShS fılıaldary) qabyldanyp jatyr.

Astanada da qys mezgili kóptegen qıyndyq týyp jatatyny málim. Áıtse de sala mamandary tótennen týyndaǵan qıyndyqtardy der kezinde eńserip keledi. Búginde salaǵa negizgi jaýapty mekeme «Astana tazalyq» qardy jınaý jáne shyǵarý jumystaryn táýlik boıy júrgizip jatyr.

Qysqy maýsymda bir aýysymda mamandan­dyrylǵan tehnıkanyń jalpy sany 400 birlikten asatyn kórinedi. Sondaı-aq qysqy mezgilde elorda joldarynda 540-tan astam júrgizýshi men 390-nyń ústinde jumysshy jumys atqaryp júr. Al qalyń qar jaýǵan kezde merdigerlik uıymdardyń 250 birlik deıin tehnıkasy qosymsha  jumysqa tartylady.

Sondaı-aq kóktaıǵaqtyń aldyn alý úshin 10 5003 qum-tuz qospasy, 590 tonna kóktaı­ǵaqqa qarsy reagent, 3000 tonna tehnıka­lyq tuz qoldanylady.