Parlament Májilisiniń depýtaty, «Respublica» partııasynyń teń tóraǵasy Rýslan Berdenov Abaı oblysyna saparynda Semeı qalasyndaǵy birqatar nysanda bolyp, kezdesýler ótkizdi.
Atap aıtqanda, qalanyń basty jylý kózderine jaýapty «Teplokommýnenergo» memlekettik kásipornynyń tynys-tirshiligimen, jumys barysymen qanyqty. Odan keıin «QTJ-Júk tasymaly» JShS-da aıaldap, eńbek adamdarymen ashyq áńgimelesti. Iаǵnı temirjol júk tasymaly júıesindegi ashyqtyq, týrızmdi damytý, elektrondy kommersııa júıesin engizý jaıymen de tanysty.
Qaladaǵy aldyńǵy qatarly saýda nysany sanalatyn «Aqshyń» saýda ortalyǵyna kelgen Májilis depýtaty elimizdegi kásipkerlik salanyń damý barysy jáne salyq saıasatynyń júzege asýyna qatysty oılaryn ortaǵa salyp, pikir almasty. Sonymen birge saýda ortalyǵynyń ishin aralaı júrip, zaman talabyna saı jasalǵan saýda alańdarynyń ornalasý retin kórip, elimizdiń bazarlarynyń modernızasııadan ótkizýge osyndaı serpindi qadamdar jasaý qajetine toqtaldy. Irgetasy qalanǵanyna 30 jyldyń júzi bolǵan «Aqshyń» saýda nysanynda bul kúnde 3 myńnan astam kásipker saýda kórigin qyzdyryp otyr.
Shákárim atyndaǵy Semeı ýnıversıtetinde Rýslan Berdenovtiń jastarmen kezdesýi el bolashaǵyna qatysty túrli taqyrypty keńinen qamtýymen erekshelendi. Ásirese qumar oıyndarǵa táýeldilik jastar arasynda keń etek alyp bara jatqany qyzý talqyǵa tústi.
– Zııandy ádetter men onyń jaǵymsyz saldary – qazirgi qoǵamnyń jahandyq derti. Keıingi kezderi jastar arasynda qumar oıyndarǵa táýeldilik beleń alyp otyr. Biz qoǵam bolyp bul máselemen kúresýimiz kerek. О́ıtkeni munyń astarynda adamdardyń, olardyń otbasylarynyń, búkil halyqtyń taǵdyry jatyr, – dedi ýnıversıtet rektory Dýman Rymǵalıuly.
Rýslan Arysbekuly stýdentterdiń nazaryn oıynǵa táýeldiliktiń jaǵymsyz saldary men Parlamenttegi partııa fraksııasy júrgizip jatqan jumystarǵa aýdardy.
– Keıingi bir jylda elimizde 350 myńnan astam oıynǵa táýeldi adam tirkelip, 2 myń saıt pen onlaın kazıno akkaýnttary buǵattaldy. Memleket basshysy Úkimetke oıynnyń zańsyz túrlerine shekteýdi kúsheıtýdi tapsyrdy. Kóptegen jastar til úırený men sportpen aınalysýdyń ornyna «ońaı aqsha» tabýdyń jolyn izdep, oıynnyń toryna qalaı túskenin bilmeı qalady. Sondyqtan meılinshe jaman ádetterden aýlaq bolyp, salamatty ómir saltyn ustanyp, bos ýaqytty ózin-ózi damytýǵa jáne ózin-ózi tanytýǵa jumsaý kerek, – dep atap ótti Májilis depýtaty R.Berdenov.
Májilismen Parlamentte atqaryp jatqan zań shyǵarý qyzmetinen de habardar etti. Bul qumar oıynǵa táýeldiliktiń taralýyn azaıtý jáne oıyn bıznesin shekteý, ekvaırıngti engizý, jańa Salyq kodeksinde QQS tómendetý sııaqty ózekti máselelerdiń túıinin tarqatýǵa baǵyttalyp otyr.
Ashyq áńgime barysynda Shákárim ýnıversıteti men Álıhan Bókeıhanov atyndaǵy ýnıversıtettiń stýdentteri qandaı kásipti bastaýǵa bolady, veıpıngke qashan tyıym salynady, qumar oıyndarǵa táýeldilikten qaı jerden emdelýge bolady, óńirdi damytýdyń bolashaǵy qandaı degen saýaldarǵa jaýap aldy. Kezdesýlerde saılaýshylar tarapynan aıtylǵan barlyq másele Májilistegi «Respublica» partııasy fraksııasynyń nazaryna alynady.
Abaı oblysy