Týrızm jáne sport mınıstri Ermek Marjyqpaev voleıbol federasııasynyń basshylarymen jáne jattyqtyrýshylar shtabymen kezdesti. Jıyn barysynda federasııa ókilderi voleıboldan ulttyq quramalardyń 2023 jylǵy nátıjelerin qorytyndylap, aldaǵy jarystarǵa daıyndyq josparyn tanystyrdy, dep habarlaıdy Egemen.kz mınıstrliktiń baspasóz qyzmetine silteme jasap.
Qazaqstanda voleıbol buqaralyq sport túri retinde keń qanat jaıyp keledi. Búginde respýblıka boıynsha 14 myń voleıbol seksııasy jumys isteıdi. Onda 600 myńnan astam bala atalǵan sport túrimen turaqty shuǵyldanady. Voleıboldan Qazaqstan ulttyq quramasy eń keıingi iri jarysta súreńsiz óner kórsetip, júldegerler qatarynan kórine almady. Esesine, jaǵajaı voleıbolynan el quramasy úshinshi orynǵa taban tiredi. Voleıbol boıynsha bıylǵy Parıj Olımpıadasyna joldama beretin barlyq irikteý týrnıri aıaqtaldy, biraq joldama buıyrǵan joq.
«Voleıbolshylarymyzdyń halyqaralyq arenada kórsetip júrgen nátıjeleri kóńil kónshitpeıdi. Klýbtar arasyndaǵy birinshilikterdi esepke almaǵanda, jerlesterimiz birneshe jyldan beri Azııa chempıonattarynda júldegerler qatarynan kórine alar emes. Erler arasyndaǵy ulttyq quramamyz sońǵy ret 2017 jyly, áıelder 2005 jyly kúmis medal jeńip alǵan bolatyn. Parıjdegi Olımpııa oıyndaryna qatysý úshin biz álemdik reıtıngte TOP-5 quramanyń qataryna enýimiz kerek ekeni belgili. Alaıda, qazirgi tańda áıelder quramasy álemdik reıtıngte 32-shi, al erler quramasy 59-orynda tur. Iаǵnı, voleıbol sporty boıynsha bizde Parıj Olımpıadasyna qatysýǵa múmkindik joq dep aıtýǵa bolady», dedi Ermek Marjyqpaev.
Qazaqstan voleıbol federasııasynyń ókilderi negizgi máseleni de búkken joq. Bar kiltıpan –ulttyq qurama oıynshylarynyń shaý tarta bastaǵanynda eken. Negizgi quramdaǵy oıynshylardyń deni 30-dan asyp ketken. Ulttyq lıganyń da deńgeıi tómen, álemdik ólshemge saı kelmeıtin kórinedi. Mınıstr federasııa ókilderine voleıbol sportyn damytyp, óńirlerdi yntalandyrýdy, el birinshiliginiń deńgeıin kóterýdi júktedi. Jas sportshylardy daıarlaýdyń jańashyl ádisin qoldaný qajettigin aıtty.