Memleket basshysy Qasym-Jomart Toqaevtyń «Egemen Qazaqstan» gazetinde jarııalanǵan suhbatynda («Ozyq oıly ult retinde tek qana alǵa qaraýymyz kerek», 3 qańtar 2024 jyl) aıtylǵan jaıtty talqylaǵan dóńgelek ústel ótti, dep habarlaıdy Egemen.kz.
«Ozyq oıly ult: máni men mindeti» degen taqyrypta órbigen basqosýǵa fılosofııa ǵylymdarynyń doktory, professor Tóleýǵalı Bóribaev, tarıhshy, Májilis depýtaty Erkin Ábil, kúıshi, kompozıtor Janǵalı Júzbaı, jýrnalıst Ońaıgúl Turjan, qatysyp, eldik murat-múdde jolyndaǵy sheshilýi tıis másele týraly soqtaly pikir aıtty.
«Búgingi kúnde ozyq oıly ultty qalyptastyramyz desek, mádenıettiń damýyn tereńdetip, til máselesin ońtaıly sheship, dilimizdi, salt-dástúrimizdi damytýymyz qajet», dedi Tóleýǵalı Bóribaev.
Májilis depýtaty Erkin Ábil ozyq oıly ult uǵymyn baǵamdaý maqsatynda alǵa jyljýǵa basymdyq berý kerektigin aıtty.
«Biz ult retinde uıystyra alatynymyz tek qoǵamdyq sana. Tarıhı sanamen ekshegende biz ótkenimizge qaraımyz, sabaq alamyz. Alǵa baǵyt túzep, keleshektiń beınesin baǵdarlaýda kenje qalyp kelemiz. Tarıhyńdy bezbendeý árıne kerek, biraq ótkenińe jıi oralyp shyrlaı bergennen góri bolashaqta qandaı elge aınalamyz degen máselege kóbirek bas qatyrý kerek», dedi E.Ábil.
Bıyl elimizde Dúnıejúzilik kóshpendiler oıyndary ótedi. Jýrnalıst Ońaıgúl Turjan Memleket basshysy suhbatynda arnaıy qaıyrylǵan Kóshpendiler oıyndary ulttyq ıdeologııany nasıhattaýdyń birden bir múmkindigi ekenin tilge tıek etti.
«Sporttyq oıyndardy ótkizý tek báıge taratyp berý dep túsiný qate. Bul oıyn Prezıdent aıtqandaı aıtýly oqıǵa bolǵandyqtan da ulttyq biregeıligimizdi pash etetin múmkindik te. Rýhymyzdy jigerlendiretin, eldigimizdi aıqyndaıtyn shara ekenin basa aıtqym keledi», dedi jýrnalıst.
Ońaıgúl Turjannyń pikirin quptaǵan Janǵalı Júzbaev ta dúnıejúzilik kóshpendiler oıyndarynda ulttyq qundylyǵymyzdy dáripteýge kúsh salý qajettigin jetkizdi. Ulttyq mýzykamyzdy da kóshpendiler oıyndarynda nasıhattaý kerek ekenin aıtty. Astana qalasyndaǵy «Áziret Sultan meshitiniń» naıb-ımamy Jumanazar О́serhanuly dástúr men din bólshektenbeıtin biregeı uǵym bolǵandyqtan da ozyq oıly ultty qalyptastyrýda dinniń de orny zor ekenin atap ótti. Qarjy mınıstrligi bıýdjettik kredıtteý, ulttyq qor, qarjy sektorlary máseleleri jónindegi ózara is-qımyl departamentiniń dırektory Aıbol Arynǵazıev Q.Toqaev suhbatynda qoǵamǵa aıtylýy tıis aqıqatty búkpesiz jetkizgenin aıtty. Ulttyń sapasy kóterilgenimen de áli de baǵdarymyzdy aıqyndaý mańyzdy ekenin usyndy.
Dóńgelek ústeldi tarıhshy, alashtanýshy akademık Dıhan Qamzabekuly júrgizdi.