Bıyl elimizde iri halyqaralyq joba – «Kóshpeliler oıyny» ótetini málim. Halqymyzdyń ǵasyrdan-ǵasyrǵa, urpaqtan-urpaqqa ulasqan uly qundylyqtaryn álem nazaryna usynatyn osy bir aıtýly dodaǵa daıyndyq jumystary bastalyp ketti. Sonyń biri ulttyq oıyndarymyzdyń tóresi sanalatyn qusbegilik óneri der edik.
«Tórtkúl dúnıe kóz tikken úlken is-sharaǵa ótken jyldan beri Ulttyq sport túrleri qaýymdastyǵy jan-jaqty daıyndyqty bastap, federasııalar jer-jerde birneshe kezeńnen turatyn irikteý jarystaryn uıymdastyryp keledi. Sondaı is-sharanyń biri, ulttyq sport túri «Qusbegilik» boıynsha Talǵar aýdanyndaǵy Panfılov aýlynyń atshabarynda irikteý jarysy ótti. Bul básekege oblystyq ulttyq sport mektepteriniń ár aýdandaǵy «Qusbegi» bóliminiń oqýshylary, órimdeı jas órkenderdiń kóptep kelýi kóńilimizdi kókke kóterdi. Jas erekshelikterine qaraı qyran qus salýdyń úsh túri boıynsha ónerlerin ortaǵa salǵandardyń barlyǵy erteńgi bolatyn álemdik dodaǵa el atynan ózindik úlesterin qosa alatyn namysty ári sheber sportshylar ekenin baıqatty. Jelkildeı ósip kele jatqan jasóspirimderdiń ulttyq dástúrdi ulyqtap, boıyna sińirýdegi talpynystary men ynta-jigerlerine rızashylyǵymyz sheksiz», deıdi respýblıkalyq «Qusbegilik» federasııasynyń vıse-prezıdenti Baǵdat Múptekeqyzy.
Eresekter, jastar men jasóspirimder arasyndaǵy bul irikteý chempıonatyna aýa raıynyń qolaısyzdyǵyna qaramastan, shalǵaıdaǵy Raıymbek, Kegen aýdandarymen qatar, irgedegi Eńbekshiqazaq, Talǵar, Ile, Jambyl, Qarasaı aýdandarynan 50-ge jýyq qusbegi qatysyp, óz múmkindikterin synǵa saldy.
Jasóspirimder arasynda ulttyq sport mektebiniń oqýshylary, atap aıtsaq, ıtelgi salýdan Hanshereı Qaıratuly, qarshyǵa salýdan Jambyl Dosymjan, búrkitten Lıman Asqarbek, al jastar arasynda Báıetbaı О́mirhan, Medet Shálipov, Danııar Múptekeev syndy úzdikter anyqtaldy.
Qolyna qyran qusty qondyrǵan jas býynnyń babalar amanatyna adaldyǵy men ony baptap-baýlýdaǵy talpynysy bolashaǵynan zor úmit kúttiredi.
Almaty oblysy