Konstıtýsııalyq sottyń sýdıasy Roman Podoprıgora Telegram arnasynda júrgizýshi kýáligi bar adamǵa jáne júrgizýshi kýáligi joq adamǵa mas kúıde kólik basqarǵany úshin kózdelgen jaýapkershilikke qatysty jazba jarııalady.
Onyń aıtýynsha, Ákimshilik quqyq buzýshylyqtar týraly kodeks talabyna saı eger adam mas kúıde kólik basqarsa, 15 táýlikke deıin ákimshilik qamaýǵa alynady jáne 7 jylǵa júrgizýshi kýáliginen aıyrylady. Al eger júrgizýshi kýáligi joq adam mas kúıde kólik aıdap ustalsa she? Onda bul adam 30 táýlikke deıin ákimshilik qamaýǵa ǵana alynady. Júrgizýshi kýáligi joq bolǵandyqtan, oǵan basqa jaza qarastyrylmaǵan.
Sýdıanyń aıtýynsha, jýyrda mas kúıde kólik aıdap, ákimshilik jaýapkershilikke tartylǵan bir azamat Konstıtýsııalyq sotqa júginipti. Sebep – zańda azamattar teńdiginiń konstıtýsııalyq qaǵıdasy buzylyp tur. Iаǵnı ol 7 jylǵa júrgizýshi kýáliginen aıyrylǵan. Al júrgizýshi kýáligi joq adam osylaı ustalsa, bar bolǵany 30 táýlikke deıin qamaýda otyryp shyǵady da, sosyn emtıhan tapsyryp, kýálik alýǵa múmkindigi bar. Sonymen birge Konstıtýsııalyq sotqa júgingen azamat júrgizýshi kýáliginen aıyrý merzimi tym uzaq ekenin aıtyp, ol azamattardyń qyzmet pen kásip túrin tańdaý quqyǵyn buzady dep esepteıtinin jetkizgen.
«Konstıtýsııalyq sot kólik quralyn basqaratyn adamdarǵa halyqaralyq aktilermen jáne ulttyq zańnamamen bekitilgen talaptardyń mańyzdy ekenin, atap aıtqanda, júrgizýshi qandaı jaǵdaıda da óziniń kólik quralyn baqylaýda ustaýy kerektigin eskertti. Mas kúıde bolý júrgizýshiniń óz-ózin ustaý jaǵdaıyna qatty yqpal etedi jáne azamattardyń ómiri men densaýlyǵyna, qozǵalys qaýipsizdigine qater tóndiredi. Konstıtýsııalyq sot jol-kólik oqıǵalarynda, onyń ishinde mas júrgizýshilerdiń kesirinen bolǵan apattarda qansha adamnyń qaza taýyp, jaraqat alǵany týraly statıstıkany keltirdi», deıdi R.Podoprıgora.
Ol shyn máninde kólik quralyn júrgizýshi kýáliginsiz basqaratyn adamdarǵa qatysty problema bar ekenin aıtady (degenmen bul jaǵdaı Konstıtýsııalyq sotqa júginip otyrǵan adamǵa tikeleı qatysty másele emes). Sýdıanyń sózinshe, tájirıbe kórsetip otyrǵandaı, kólikti mas kúıde aıdaǵany úshin ákimshilik jaýapkershilikke tartý ol adamdardyń keıin júrgizýshi kýáligin alýyna kedergi keltirmeıdi. Sondaı-aq olar 7 jyl boıyna kútip júrmeıdi. Bul, árıne, júrgizýshi kýáligi joq adamǵa kólikti mas kúıde aıdaǵany úshin beriletin jaza júrgizýshi kýáligi bar adamdardyń jazasynan jeńilirek ekenin ańǵartyp turǵany ras. «Sondyqtan osyndaı jaǵdaıdyń aldyn alý maqsatynda Konstıtýsııalyq sot zańnamaǵa jol qozǵalysy týraly jańa jazany qosýdy usynady. Ol – kólik quralyn basqarý quqyǵyn beretin kýálikti alý úshin emtıhan tapsyrý múmkindigin belgili bir ýaqytqa shekteý», deıdi ol.
«Konstıtýsııalyq sot Ákimshilik quqyq buzýshylyqtar týraly kodekstiń kólik quralyn mas kúıde basqarý úshin jaýapkershilik kózdelgen túrli baptary profılaktıkalyq maqsatta bir-birimen úılesim tabýy kerek dep esepteıdi. Al azamat aıtyp otyrǵandaı, eńbek erkindigi, kásip tańdaýǵa qoıylǵan shekteýge kelsek, KS ol adamda basqa da qyzmet túrlerimen (kólik basqarýmen baılanysty emes) aınalysý múmkindigi bar ekenin eske salady. Sondaı-aq júrgizýshi kýáliginen aıyrý merzimi ótken soń kólik quralyn basqarýmen baılanysty qyzmetke qaıtyp kele alady. Nátıjesinde, shaǵym keltirilgen zań normasy Konstıtýsııaǵa saı dep tanyldy», deıdi R.Podoprıgora.