Almatymen qanattas Qarasaı aýdanynda oqýshy sany jyl saıyn 6 myńǵa artady eken. Oǵan demografııalyq ósimmen qosa, ishki mıgrasııanyń áseri zor. Mysaly, ótken jyly 11-synypty 2,5 myń bala támamdasa, bıylǵy oqý jylynda bastaýysh synypqa 8,5 myń búldirshin qabyldanǵan. Bul kórsetkishter mektep salý isiniń ózektiligin ańǵartady.
– Áıteı aýyldyq okrýgine qarasty Úshterek aýylynda №2 orta mektep ashylyp, óz jumysyn bastady. №1 orta mektep aýyldyń ortasynda ornalasqan. Onyń jobalyq qýattylyǵy 300 oryndyq, áıtse de qazirgi kúnge deıin ol mekteptegi oqýshy sany 1 myńnan asyp, úsh aýysymda oqytylyp keldi. Endi jańa mekteptiń qoldanysqa berilýine baılanysty 600 bala avtomatty túrde jańa ǵımaratqa aýysyp, úsh aýysymdyq bilim berý máselesi sheshildi. №1 mektepte 600-ge jýyq bala aýyl syrtyndaǵy saıajaılardan qatynap oqıtyn. Bul másele de túbegeıli sheshimin taýyp otyr. Oǵan qosa osy mańaıdaǵy 270 bala kórshiles Turar aýylyndaǵy mektepke baratyn. Jańa mekteptiń iske qosylýynyń nátıjesinde bul máseleniń de kúrmeýi tarqatyldy, – dedi Qarasaı aýdandyq bilim bóliminiń basshysy Ásel Erkinbaeva.
Qarasaı aýdanynda qazir 6 mektep úsh aýysymmen jumys istep tur. Atalǵan máseleni sheshý maqsatynda «Jaıly mektep» jobasy aıasynda 10 mekteptiń qurylysy josparlanǵan. Qazirgi kúni 8 mekteptiń qurylysy bastaldy. Budan bólek memlekettik-jekemenshik áriptestik negizinde «Asyl arman» turǵyn úı kesheninde 1 500 oryndyq jáne «О́mirzaq» turǵyn úı kesheninde 900 orynǵa arnalǵan mektep qurylysy júrip jatyr. Osy 10 mektep paıdalanýǵa berilse úsh aýysymmen oqytý máselesi túbegeıli sheshim tappaq.
Bıylǵy oqý jylynda 600 oryndyq eki mektepke eki japsarjaı salynyp qoldanysqa berilse, sondaı-aq Jarmuhambet aýylynda irgesi qalanǵan 600 oryndyq, «Qarlyǵash» shaǵyn aýdanynan 1 200 oryndyq jańa mekteptiń qurylysy aıaqtalyp, paıdalanýǵa berilgen. Sonyń nátıjesinde oqý jylynyń basyndaǵy úsh aýysymdyq 12 mekteptiń máselesi eki ese azaıǵan.
Halyq sany 6 myńǵa jýyqtaıtyn Úshterek aýylyndaǵy №2 orta mekteptiń ashylý saltanatynda Qarasaı aýdany ákiminiń orynbasary Rýstam Ámirǵalıuly turǵyndardy qýanyshymen quttyqtap, bilim ordasynan oqýda ozat, tártipti de tárbıeli oqýshylardyń kóptep shyǵýyna tilektestigin bildirdi.
Zamanaýı úlgide salynǵan jańa mektepte oqýshylardyń tolyqqandy bilim alýyna, ónerge beıimdelýine barlyq jaǵdaı jasalǵan. Sport zal, akt zaly men keń de jaryq ashana talapqa saı qajetti qurylǵylarmen jabdyqtalǵanyna ata-analar rızashylyǵyn bildirdi. «Nemeremizdiń osyndaı sáýletti mektepte bilim alatynyna qýanyp otyrmyz. Qansha jyldan beri qashyqtaǵy mektepke tasymalmen oqytýdyń áýresin kórdik. Endi mine, úıimizdiń janyndaǵy jańa mektepke barý baqyty buıyrdy. Osynyń salynýyna atsalysqan azamattarǵa alǵysymyz sheksiz, nemerelerimizdiń bilimdi, ónerli bolyp ósýine úlesimizdi qosamyz», dedi qýanyshyn jasyra almaǵan «Araı» saıajaıynyń turǵyny Dına Aıazbaıqyzy.
Sondaı-aq dál osy kúni oblysqa qarasty Uıǵyr aýdanynyń Shonjy aýylynda da úsh qabatty 900 oryndyq mektep boı kótergenin aıta keteıik. J.Qudaıbergenov atyndaǵy orta mekteptiń ashylý saltanatyna Almaty oblysynyń ákimi Marat Sultanǵazıev arnaıy qatysyp, ustazdar qaýymy men oqýshylardy, ata-analardy qýanyshty sátpen quttyqtady. Bul kúni paıdalanýǵa berilgen eki jańa mektep te qazaq tilinde sabaq beretinin erekshe ataǵymyz keledi.
Almaty oblysy