Qyzylordadaǵy Á.Tájibaev atyndaǵy oblystyq kitaphanada memleket jáne qoǵam qaıratkeri Qyrymbek Kósherbaevtyń «Aınalaıyn, Azattyq!» kitabynyń tusaýkeseri ótti. Zııaly qaýym ókilderi bas qosqan rásimde oblystyq kitaphana dırektory, tarıh ǵylymdarynyń kandıdaty Nurlybek Myńjasov tirliktiń ashysy men tushysy, beıneti men zeıneti baıandalǵan bul týyndy qaıratker ómiriniń ónegeli sózi ekendigine toqtaldy.
Kitap mazmunyn saralaǵan oblystyq máslıhat tóraǵasy, tarıh ǵylymdarynyń kandıdaty Naýryzbaı Baıqadamov elge qaltqysyz qyzmet etýdiń úlgisin kórsetken qaıratker kitabynyń qoǵamdaǵy mańyzyn atap ótti.
– El aldyndaǵy qyzmettiń basty sharty – ótkenniń ónegesin umytpaý. Ǵumyry el táýelsizdigimen qatar órbip, bes salaǵa mınıstr, úsh óńirge ákim, Reseı memleketinde elshi, Prezıdent Ákimshiliginiń basshysy qyzmetterin atqarǵan Qyrymbek Eleýulyn qazaqtyń qabyrǵaly qaıratkerine aınaldyrǵan da osy ustanym. Otbasyndaǵy tárbıeni tuǵyr etip, bıik tórden eldiń sózin sóılegen tulǵanyń aıtar oıy biz úshin qundy, – dedi Naýryzbaı Baıqadamov.
Saıası ǵylymdar doktory, qoǵam qaıratkeri Murat Baqtııaruly kitap mazmuny jóninde aıta kelip, táýelsiz el tarıhynda orny bar tulǵanyń ózin el qyzmetine baýlyǵan ustazdaryna degen qurmetine tánti ekendigin jetkizdi.
– Osydan biraz buryn Qyrymbek Eleýulynyń «Qundylyqtar quldyramasyn» degen týyndysyn tushyna oqyǵanymyz este. Búgin qolymyzǵa tıip otyrǵan kitap sonyń zańdy jalǵasy ispetti. Ásirese men úshin bul kitapta avtordyń óziniń ustazdaryna, rýhanııat salasyndaǵy ult zııalylaryna degen pikirleri qyzyqty, – dedi ǵalym.
Jıynda baspa júzin kórgenine kóp ýaqyt ótpegen kitap týraly pikir bildirgen Qorqyt Ata atyndaǵy Qyzylorda ýnıversıtetiniń rektory Beıbitkúl Kárimova «Aınalaıyn, Azattyq!» estelik-essesi – qazaq memýarıstıka janryna qosylǵan súbeli úles ekendigine toqtaldy.
– Álemde memleket basqarǵan kisilerdiń, saıasatkerlerdiń, belgili memleket jáne qoǵam qaıratkerleriniń estelik jazýy – qalypty úrdis. Mundaı dástúr bizdiń elde de bar. Qazaqstandy uzaq jyldar basqarǵan Dinmuhamed Ahmetuly Qonaevtyń «Aqıqattan attaýǵa bolmaıdy», «О́tti dáýren osylaı» atty ǵumyrnamalyq kitaby, belgili tulǵalar Isataı Ábdikárimovtiń «Kóp eken kórgenimnen kórmegenim», Asanbaı Asqarovtyń «Taǵdyr» atty eńbekteri el tarıhynyń eleýli kezeńderinen syr shertedi. Memleket jáne qoǵam qaıratkeri Qyrymbek Kósherbaevtyń qolymyzǵa tıip otyrǵan «Aınalaıyn, Azattyq!» kitaby da – ǵıbratty, taǵylymdy, ónegesi mol týyndy – dedi Beıbitkúl Sársemhanqyzy.
Jıyn sońynda Kósherbaevtar áýleti atynan Qyzylorda qalasy, Aral, Qazaly jáne Syrdarııa aýdandarynyń Qurmetti azamaty Aıtbaı Kósherbaev tusaýkeser rásimin uıymdastyrýshylarǵa alǵysyn bildirdi.
Qyzylorda