Kúni keshe Syrtqy ister mınıstrliginiń resmı ókili Aıbek Smadııar Qazaqstanda orys tiliniń qoldaný aıasy tarylyp jatyr dep jazba jarııalaǵan jýrnalıst Tına Kandelakıdiń elimizge kirgizilmeıtinin aıtqan edi. Búgin reseılik jýrnalıst Aıbek Smadııardy Máskeýge shaqyrdy, dep jazady Egemen.kz.
Reseılik jýrnalıst eki el arasyndaǵy tarıhı-mádenı baılanysty aıta kele sol elde esimi ardaqtalyp júrgen qazaq tulǵalarynyń esimin tizip shyqqan.
«Reseı men Qazaqstannyń estelik mozaıkasynan tańǵajaıyp áńgimeler men uly esimder týady. Eń bastysy - este saqtaý. Men áli de vırtýaldy qarym-qatynastarymyzdy bir-birine jaqyn eki halyqtyń tarıhyna, mádenıetine jáne kıeli jerlerine degen qurmet pen súıispenshilik negizinde qurýdy usynamyn. Men sizdi vırtýaldy álemde emes, shynaıy qonaq retinde kútemin», dep Tına Kandelakı sózin qorytyndylady.
Eki aradaǵy til tartysyna Reseı Syrtqy ister mınıstrliginiń resmı ókili Marııa Zaharova da ún qosty.
«Tınany da, Aıbekti de jaqsy bilemin. Ondaı kezdesý bolsa, óte qyzyq, ózara syılastyqqa toly pikirtalas bolatynyna senemin. Bárimizge mazmuny baı ortaq tarıhymyzdyń úzdik tustaryn saqtaý baǵytynda jumys isteý kerek. Bul isti ádeppen, retpen atqarý kerek», dedi Marııa Zaharova.