Shyǵys Qazaqstan oblysynyń Samar aýdanyna qarasty Kókjota aýyly turǵynynyń qorasyna belgisiz ań túsip, oıran salǵan, dep habarlaıdy Egemen.kz.
Ákimdiktiń málimetinshe, Edilhan Sarbasov esimdi azamattyń qorasyna túsken belgisiz ań 15 qoıdy qyryp, taǵy 10 qoıdy jaralap ketken. Aýyl turǵyndarynyń sózinshe, bul qańǵybas ıtterdiń isi bolýy múmkin emes, ıtter ádette óli malǵa aýyz salady.
Atalǵan eldi mekenge aýdan basshysy Nurlan Mahambetov, aýyldyq okrýg ákimi jáne jergilikti polısııa bóliminiń qyzmetkerleri bardy. Olardyń aıtýlarynsha, jyrtqysh qora esiginiń túbin qazyp kirgen.
«Sileýsin shyǵar degen oıdamyz. Qasqyr bolsa qoılardy jaryp keter edi, al bul tek qanyn ishken. Jaraly 10 qoı da baýyzdaldy», dedi ákimdik ókilderi.
Anyqtalǵandaı, barlyǵy aýyldaǵy mal óleksesin kómýge arnalǵan orynǵa kómilmek, óıtkeni ańnyń silekeıinde qaýipti aýrýlar bolýy múmkin.