«KEGOC» AQ byltyrǵy jumysyn qorytyndylady. О́tken jumada ótken baspasóz brıfınginde aıtylǵan derekter boıynsha atalǵan kompanııanyń jalpy paıdasy 2022 jylmen salystyrǵanda 39 paıyzǵa, ıaǵnı 50,9 mlrd teńgeden 70,5 mlrd teńgege deıin ósken.
Brıfıngte aıtylǵandaı, elimizde elektr energııasyn tutyný 1,9 paıyzǵa artqan. Al túsim 251,9 mlrd teńgeni qurap otyr. «KEGOC» AQ basqarma tóraǵasy Nábı Aıtjanovtyń aıtýynsha, bul kórsetkish ósim negizinen retteletin qyzmetter boıynsha kólemder men tarıfterdiń ósýi jáne operasııalyq shyǵyndardy ońtaılandyrý esebinen qalyptasyp otyr. Sonymen kompanııadaǵy taza paıda ótken jyldyń qorytyndysymen 42,7 mlrd teńge bolsa, bul 2022 jylmen salystyrǵanda 60 paıyzǵa joǵary. Ol jyly kompanııa paıdasy 26,7 mlrd teńgeni quraǵan edi. Bir qyzyǵy, byltyr kompanııanyń taza paıdasy 31,5 mlrd teńge bolady dep aldyn ala boljanǵan edi. Búginde «KEGOC» AQ boljanǵan qarjynyń ósýin eskerip, ekinshi jartyjyldyqta tólenetin dıvıdend kólemin ulǵaıtý máselesin qaraýda. Basqarma tóraǵasy mundaı sheshim aksıonerler úshin de, áleýetti ınvestorlar úshin de oń serpin bolatynyn atap ótti.
– О́tken jyldyń ekinshi jarty jyldyǵynyń qorytyndysy boıynsha dıvıdendter tóleý bıyl ekinshi toqsanynda júzege asyrady. Kompanııada dıvıdendtik saıasat jańartyldy, oǵan sáıkes, ony tóleýge taza paıdanyń keminde 60 paıyzy jumsalady. «KEGOC» AQ aksıonerlerine dıvıdendter jylyna eki ret tólenedi. Byltyr birinshi jartyjyldyq boıynsha kompanııa 20,2 mlrd teńge mólsherinde dıvıdendter tóledi, – dedi N.Aıtjanov.
Sondaı-aq kompanııa jańa jobalardy engizý jáne qoldanystaǵy jelilerdi jańǵyrtýdy jalǵastyra bermek. Al byltyrǵy qorytyndy boıynsha Batys energııa torabynyń elektr jelilerin kúsheıtý boıynsha iri ınvestısııalyq jobanyń aıaqtalýyn aıtýǵa bolady. Bul joba osy jelilerdiń qyzmet etý merzimin 30 jyldan asa ýaqytqa uzartty. Al búginde Birtutas elektr energetıkalyq júıesiniń Ońtústik aımaǵyn nyǵaıtý jobasy bastalyp ketken. Jobada Jambyl jáne Túrkistan oblystarynyń 500 kV-tyq elektr jelilerin kúsheıtý, onyń ishinde úsh qosalqy elektr stansasyn keńeıte otyryp, 500 kV-tyq «Shý – Jambyl – Shymkent» áýe jelisin salý qarastyrylypty.
Aıta keteıik, búginde kompanııanyń balansynda uzyndyǵy shamamen 27 myń shaqyrym, kerneýi 220-1150 kV elektr jelileri men transformatorlarynyń belgilengen qýaty 38,99 GVA bolatyn 83 qosalqy elektr stansasy bar.