Jetisý oblysy, Eskeldi aýdany, Jalǵyzaǵash aýylyndaǵy atseıis, áıgili tulpar Jumyrtuıaqtyń ıesi júırigi satylatynyn aıtty, dep jazady Egemen.kz.
«TOP BAIGE» ıýtýb arnasyna suhbat bergen sharýashylyq jetekshisi Marat Aqylbaıuly kóptiń kózaıymyna aınalǵan tulpary Jumyrtuıaqqa kóz tigýshilerdiń kóbeıgenin aıtty.
«Qolymyzda qanshama júırikterdi baptadyq. О́zińe jaqyn jylqy bolady, sony sat dep qıylyp suraıtyndar bar, biraq bergiń kelmeıdi. Qyrsyq bolǵanda satylmaıdy degen júırigiń aıaǵyn shaýyp alady, basqa da kedergige ushyraıdy. Jumyrtuıaqty qunan kezinde 70, 100 myń AQSh dollaryna sat degen adamdar boldy. Qazir tipti suraýshylardyń qarasy artyp ketti. Kóbine maǵan emes, atbegi Marlan Bektenovke habarlasady. Biz Jumyrtuıaqty 1 mıllıon AQSh dollaryna satamyz dedik. Sondaı baǵaǵa alamyn degen jan bolsa, jetektetip jiberemiz. Bul jerde mańyzdysy aqsha emes, eń keremet sáti - atyńnyń qara úzip shyǵyp, kómbeden dara kelýi. Qıqýǵa qıqý qosqan alqaly toptyń aldynda júırigiń mereıińdi asyryp, meımanańdy tasytyp aldymen kelgen sáttegi sezimdi eshteńege aıyrbastaı almaısyń. Jumyrtuıaq bizdiń ǵana emes, Jalǵyzaǵash aýylynyń tulpary sanalady», dedi Marat Aqylbaıuly.