Jarkent qalasynyń Ybyraı Altynsarın atyndaǵy orta mektebinde 74261 áskerı bóliminiń qolbasshylyǵy men áskerı qyzmetshilerdiń otbasy múshelerimen jumysty uıymdastyrý jónindegi qyzmet ókilderi Halyq qaharmandary Saǵadat Nurmaǵambetov pen Raqymjan Qoshqarbaevtyń 100 jyldyǵyna oraı is-shara uıymdastyrdy.
Is-sharaǵa belgili kompozıtor Maqsat Jáýtikov, «Qurmet», «Dańq» ordenderiniń ıegeri, Panfılov aýdanynyń Qurmetti azamaty, eńbek ardageri Kúlǵaısha Berdiǵulova, tyl eńbekkeri, Sosıalıstik Eńbek eri Kúlásh Aıtjanova jáne Qazaqstannyń eńbek sińirgen muǵalimi Nurǵaısha Shaıdildınova arnaıy shaqyryldy.
Qos batyrdyń ǵasyrlyq mereıtoıyna arnalǵan keshti Qurlyq áskerleri bas qolbasshysynyń tárbıe jáne ıdeologııalyq jumys jónindegi orynbasary, polkovnık Ermııan Bıatov ashty.
«Bıyl biz qazaq halqynyń dańqty uldary, batyrlar Saǵadat Nurmaǵambetov pen Raqymjan Qoshqarbaevtyń 100 jyldyǵyn atap ótemiz. Olar kózsiz erligi men janqııarlyq qyzmetiniń arqasynda óshpes dańqqa bólendi. Batyr atalarymyz biz úshin de, bolashaq urpaq úshin úlgi bolyp qala beredi», dep atap ótti ol.
Kezdesýde dańqty batyrlar týraly mazmundy baıandamalar oqyldy. Ásirese olarmen etene tanys bolyp, birge qyzmet etken kózkórgenderdiń estelikteri erekshe qundy bolǵanyn da aıta ketý kerek.
Áskerı qyzmetshilerdiń otbasy múshelerimen jumysty uıymdastyrý qyzmeti is-sharaǵa áskerı qyzmetshilerdiń ata-analaryn da qatystyrdy. Uldary Aqtaý qalasy men Merki aýlynda qyzmet etip jatqan analar balalarymen beınebaılanys arqyly sóılese aldy.
Is-shara aıasynda Halyq qaharmandary Saǵadat Nurmaǵambetov pen Raqymjan Qoshqarbaev týraly kitap kórmesi uıymdastyrylyp, derekti fılmder kórsetildi. Kezdesýde birqatar sarbazǵa, bólimshe komandıri men bólimshe feldsherine adal qyzmeti úshin alǵyshattar men baǵaly syılyqtar tapsyryldy.
Is-shara 74261 áskerı bólimi kórkemónerpazdarynyń kúshimen daıyndalǵan konsertpen aıaqtaldy. Kesh barysynda tektiliktiń, súıispenshilik pen adaldyqtyń sımvoly bolǵan ofıserler valsi erekshe áserli boldy.