Jańaarqa aýdanynyń ortalyǵy Atasý kentindegi S.Seıfýllın atyndaǵy tarıhı-ólketaný mýzeıiniń tarıhy ótken ǵasyrdyń 60-jyldarynan bastalady. Eńbek jáne soǵys ardageri, tarıh pániniń muǵalimi, Jańaarqa aýdanynyń qurmetti azamaty Dalbaı Iztóleýov osy iske muryndyq bolyp, qolyna túsken qundy jádigerlerdi bir jerge jınastyra bastaǵan kórinedi. Biraq jıyrma jyldan asa ýaqyt mýzeı mártebesi berile qoımapty. Tek 1984 jyly resmı túrde ashylyp, sol jyly týǵanyna 90 jyl tolýyna baılanysty mýzeıge Sáken Seıfýllınniń esimi berilipti.
2004 jyly aýdannyń 75 jyldyǵy jáne S.Seıfýllınniń týǵanyna 110 jyl tolýyna baılanysty ótkizilgen is-sharalardyń aıasynda mýzeı jeke ǵımaratqa kóshirilgen.
Qazir tórt zaldan turatyn mýzeıden eldiń, jerdiń tarıhyna qatysty kóptegen jádigerdi tamashalaýǵa bolady.
Solardyń qatarynda Sáken Seıfýllınniń tutynǵan zattarynyń orny erekshe.
Mysaly, aqyn ustaǵan aqquman men 2 keseni mýzeıge 1994 jyly Sákenniń inisi Májıttiń qyzy Rymjan tapsyrǵan kórinedi. Qytaı farforynan shamamen HIH ǵasyrdyń sońy HH ǵasyrdyń basynda jasalǵan bul ydystardy aqynnyń jary Gúlbahram ózi qýǵyn -súrginge tartylǵan ýaqytta qaınysy Májıtke amanattap tapsyrǵan eken. Rymjan Májıtqyzy sol joly Sáken atasynyń qant usatqyshyn da mýzeıge ótkizipti. «Shaıy shúberekten tigilgen, astary sur tústi jibekten salynyp, jaǵasy syrylyp tigilgen ózbek shapanyn da mýzeıge Rymjan sol saparynda tapsyryp ketipti. Bul shapandy Sákenge О́zbekstanǵa issaparmen barǵanda ala taqııaly aǵaıyndar ıyǵyna japqan eken», deıdi mýzeıdiń dırektory Erbolat Shýbaev.
Al aqynnyń saby tobylǵydan jasalyp, terimen qaptalǵan órim qamshysy men etik tigýge, jóndeýge arnalǵan quraldaryn 1994 jyly Taıtóleý Asqartegi degen kisi tapsyrypty. Mýzeı ár jyl saıyn Sáken Seıfýllınniń ómiri jáne shyǵarmashylyǵyna arnalǵan kórmeler uıymdastyryp otyrady. Aqynnyń týǵanyna 130 jyl tolýyna baılanysty bıyl S.Seıfýllınniń esimine qatysty is-sharalardyń jyldaǵydan kóbirek bola túsetini kúmánsiz.
Ulytaý oblysy,
Jańaarqa aýdany