Búgin - Ǵylymdaǵy áıelder men qyzdardyń halyqaralyq kúni. Ataýly kúnge oraı Mádenıet jáne aqparat mınıstri Aıda Balaeva quttyqtaýynda ǵylym salasyndaǵy áıelder qaýymynyń eńbegin nasıhattaýǵa shaqyrdy, dep jazady Egemen.kz.
«Bul kún áıelder men qyzdarymyzdyń ǵylym men tehnıka salasyndaǵy múmkindikterin damytýǵa qoldaý kórsetýdiń mańyzyn eske salady.
Ǵylymǵa qyzyǵatyn qyzdar úshin úlgi alatyn tulǵalardyń bolýy mańyzdy.
Jaqynda bıolog, belgili ǵalym Kúnsulý Zakarıa vaksınasııa salasynyń damýyna úles qosqan áıelderdiń álemdik reıtıngine endi. Onyń jetekshiligimen bir top ǵalym 2020 jyly otandyq «QazVac» vaksınasyn ázirledi. Odan bólek elimizdegi Ǵylym akademııasy tarıhyndaǵy tuńǵysh áıel prezıdent, bıologııa ǵylymdarynyń doktory - Naǵıma Aıthojına, Ortalyq Azııadaǵy geologııa ǵylymdarynyń doktory bolǵan tuńǵysh áıel Patshaıym Tájibaeva sııaqty tulǵalarmen biz erekshe maqtanamyz.
Jalpy búginde otandyq ǵylym jańa kezeńge aıaq basyp otyr. Memleket basshysy bul baǵyttyń mańyzdylyǵyna erekshe mán berýde. Osy saladaǵy atqarylyp jatqan jumystar aıtarlyqtaı nátıje kórsetetin ǵalymdardyń jańa qaýymdastyǵynyń qalyptasýyna yqpal etti.
Degenmen bul kúnderi ǵylymı-zertteý jáne tájirıbelik-konstrýktorlyq jumystarǵa qatysatyn áıelderdiń úlesi shamamen 54% quraıdy, bul - 10 myńnan astam adam. Alaıda olardyń esimderi men jetistikterinen kópshiligi beıhabar.
Sondyqtan osy jazbam arqyly barshańyzdy ǵylymdaǵy áıelderdi qoldaýǵa jáne olardyń esimderi men jetistikterin kóbirek nasıhattaýǵa shaqyramyn», dep jazdy mınıstr áleýmettik jelidegi paraqshasynda.