Qys – qatal synshy. Bul mezgildiń bir syn saǵaty qoldan keler qaıran bolmaı, qar qursaýynda qaırańdap qalǵanda týady. Mundaı qıyn jaǵdaıǵa tap kelgen janǵa sýyq tıip, úsik shalyp, ómirine qaýip tónýi múmkin. Búginde osyndaı qaýip-qatermen betpe-bet kelip, qolaısyz aýa raıynda aıdalada qalyp qoıǵan azamattar az bolmaı tur. Qýanyshtysy, bul sharasyz jandardyń qasynan shıraq ári sheshimtal qutqarýshylar tabylyp, qanshama ómirdi arashalap qaldy.
Osy qysta Tótenshe jaǵdaılar mınıstrliginiń qutqarý bólimsheleri qar qursaýynan 10 myńnan asa adamdy, onyń ishinde 488 balany qutqaryp, qaýipsiz jerge jetkizdi. Buǵan qosa 1 266 birlik tehnıka de tegis jolǵa shyǵaryldy. Búginde elimizdiń túkpir-túkpirinde jedel shtabtar jumys istep jatyr. Bularǵa mınıstrliktiń respýblıkalyq shtaby basshylyq etedi. 13 óńirde respýblıkalyq jáne oblystyq mańyzy bar avtojoldarda blok-beketter qoıylyp, kóliktiń barlyq túri úshin qozǵalys shekteldi. Aqtóbe, Aqmola, Qostanaı, Pavlodar, Ulytaý oblystarynyń ýaqytsha ornalastyrý pýnktterinde 1 107 adam bar.
Jalpy, 7-9 aqpan aralyǵynda qutqarýshylar búkil el kóleminde qar qursaýynan 1 426 azamatty qutqaryp, evakýasııalady jáne 64 kólik quralyn alyp shyqty. Osy oraıda Tótenshe jaǵdaılar mınıstrligi azamattardy qys mezgilinde avtojoldarda qaýipsizdik sharalaryn saqtaýǵa shaqyrýdan tanbaıdy. Mundaı jaǵdaıda 112 habarlamalaryn nazarǵa alyp, daýyldy eskertý kezeńinde jáne meteojaǵdaılar nasharlaǵan kezde eldi mekenderden alys saparlarǵa shyqpaı, shalǵaı jaqqa jaıaý júrýden de saq bolǵan jón.