Almaty oblysynda brakonerlerden 200 keli balyq pen jabaıy janýardyń eti, sondaı-aq qarý men oq-dáriler tárkilendi, dep jazady Egemen.kz Polisia.kz-ke silteme jasap.
9 aqpanda «Brakoner» jedel aldyn alý is-sharasyn ótkizý barysynda Almaty oblysy PD UQQKB qyzmetkerleri tabıǵatty qorǵaý polısııasynyń qyzmetkerlerimen birlesip, Nurly aýylynyń mańyndaǵy Ile ózenine jaqyn jerden úsh rezeńke qaıyqty anyqtady. «Tekserý barysynda Eńbekshiqazaq aýdanynyń 22 jáne 42 jas aralyǵyndaǵy alty turǵyny zańsyz ań aýlaýmen jáne balyq aýlaýmen aınalysqany anyqtaldy. Sondaı-aq eki qozǵaltqyshy bar úsh qaıyq, jalpy salmaǵy shamamen 200 keli bolatyn balyq, jabaıy janýardyń eti tabylyp, tárkilengenin», dep málim etti Almaty oblysy PD bastyǵy Baýyrjan Álenov.
Qaıyqty teksergende 10 patron, 12 kalıbrli patron oq-dárisi bar tirkelmegen qarý kesindisi, ósimdik quramdy erekshe ıisti polıetılen paket jáne ózen túbinen tegis uńǵyly myltyq tabylyp, tárkilengen. B.Álenov zańsyz ań, balyq aýlaý faktisi jáne atys qarýy men esirtki zatyn zańsyz alyp júrý, saqtaý boıynsha saraptamalyq zertteý taǵaıyndalyp, sotqa deıingi tergeý bastalǵanyn aıtty.