Almatyda alqabıler 2023 jyly taksı júrgizýshisin óltirdi dep aıyptalǵan kámeletke tolmaǵan eki jasóspirimge úkim shyǵardy, dep habarlaıdy Egemen.kz.
Almatynyń qylmystyq ister jónindegi mamandandyrylǵan aýdanaralyq sotynyń baspasóz qyzmeti habarlaǵandaı, sot Almatyda bolǵan taksı júrgizýshisiniń ólimine qatysty qylmystyq is boıynsha úkim shyǵardy.
Kámeletke tolmaǵan eki jasóspirimge Qylmystyq kodekstiń úsh baby (99-baptyń 2-bóligi, 7, 8-bólimderi, 200-babynyń 2-bóligi, 1-bólimi, 188-babynyń 2-bóligi, 1-bólimi) boıynsha aıyp taǵylyp otyr. Olar 2023 jyldyń jazynda Shymkentten Almatyǵa deıin jetý úshin taksı shaqyrǵan. Mejeli jerge jetken kezde olar júrgizýshige 40 myń teńge tóleýden bas tartyp, aldyn ala kelisim boıynsha ony óltirip ketken.
«Sottalýshylar júrgizýshige birneshe ret pyshaq jaraqatyn salǵan, sonyń saldarynan júrgizýshi oqıǵa ornynda kóz jumdy. Keıin sottalýshylar jábirlenýshiniń kóligin aıdap, 80 myń teńge turatyn uıaly telefonyn urlap ketken», dedi sot.
Aıyptaýshy tarap aıyptalýshylardy on jylǵa bas bostandyǵynan aıyrýdy surady. Kámeletke tolmaǵandar ózderiniń kinásin moıyndamady.
«Sot úkimi boıynsha sottalýshylar qasaqana adam óltirgeni úshin (Qylmystyq kodekstiń 99-baby 1-bóligi boıynsha) kináli dep tanylyp, árqaısysy 12 jyldan bas bostandyǵynan aıyryldy. Úkim zańdy túrde kúshine engen joq», dep habarlady sottyń baspasóz qyzmeti.