Kolledj stýdenti «Umit» chat-botyn jasady. Chat-bot qala turǵyndaryn áleýmettik jaǵynan qoldaý baǵytynda qolǵa alynǵan. Kómekshi quraldyń qoldanylý aıasyn keńeıtip, bolashaqta el kóleminde naryqqa shyǵarý josparlanyp otyr.
Qosymshanyń «Umit» atalýy da beker emes eken, sebebi bul negizgi zańnamalyq kózderden alynǵan qurylymdyq aqparatqa súıene ázirlengen áleýmettik mańyzy bar kómekshi qural bolmaq. Ony jasaǵan Baqyt Edilqyzy Abaı oblysynyń R.Baıseıitov atyndaǵy Semeı ekonomıkalyq-qarjy kolledjiniń 3-kýrsynda oqıdy. Onyń chat-boty arqyly áleýmettik baǵdarlamalardy izdeýge jáne tańdaýǵa, sondaı-aq qujattardy toltyrý barysynda kómek pen týyndaǵan máseleler boıynsha keńes alýǵa bolady. Buǵan qosa qosymsha mańyzdy kúnder men merzimder týraly eske salyp otyrady.
Avtor óziniń qosymsha jasaýdaǵy oıyn: «Osyndaı ozyq ázirlemelerdiń nátıjesinde bizdiń oblys áleýmettik qyzmetter kórsetýde aldyńǵy qatarda bolǵanyn qalaımyz. Sıfrlyq ǵasyrdyń qajettilikterine sáıkes keletin jańa deńgeıge shyǵýǵa bolady. Eń basty maqsat – mundaı qyzmetterdi muqtaj adamdarǵa shynymen qoljetimdi etý. Biz bul ıgi iske óz úlesimizdi qosýǵa daıynbyz», dep túsindiredi.
Jasampaz stýdent birinshi kezeńde neırondyq jeli úshin oqytý modelin alǵan. Sodan soń áleýmettik qoldaý, eńbek jáne salyq qatynastary máselelerin retteıtin osyndaı irgeli zańnamalyq kózderden alynǵan qurylymdyq aqparat toptastyrdy. Ekinshi kezeńde paıdalanýshylarǵa usynylatyn aqparattyń tolyqtyǵy, ózektiligi men paıdasyn baıqaý maqsatynda bot shyǵarǵan sheshimderdiń durystyǵyn taldap, ártúrli jaǵdaıdaǵy mysaldy jasandy ıntellekt modelinde tekserip kórgen. Umit chat-botyn ázirleý úshin jasandy ıntellekt tehnologııalaryna negizdelgen vızýaldy prototıpteý múmkindigi bar (no-code approach) arnaıy chat-bot konstrýktory paıdalanyldy. Bul platforma tabıǵı, kádimgi qoldanystaǵy tildi tıimdi óńdeýge arnalǵan mashınalyq úıretýdiń ozyq algorıtmderimen jabdyqtalǵan. Stýdentter, muǵalimder men jumysshylar, tipti basqa kolledjder arasynda testileý men eksperımentter júrgizildi. Bul is júzinde bot ınterfeısiniń tıimdiligin baǵalaýǵa, onyń jaýaptary maqsatty aýdıtorııa úshin qanshalyqty túsinikti jáne paıdaly ekenin túsinýge, testileýdegi tıptik suraqtar men máselelerdi anyqtaýǵa múmkindik berdi.
Joba jetekshisi, joǵaryda atalǵan kolledjdiń oqytýshysy Artýr Iskakov bolashaqta elektrondyq úkimet portaldary, bankter, jumyspen qamtý qyzmetteri jáne t.b. sııaqty memlekettik jáne kommersııalyq servıster arqyly ıntegrasııalaý josparlanǵanyn jetkizdi. Olar Qazaqstannyń barlyq óńirin qamtý, sodan keıin jergilikti zańnamanyń erekshelikterin eskerip, Eýrazııalyq ekonomıkalyq odaqqa kiretin elderdiń naryǵyna shyǵýdy kózdep otyr. Sondaı-aq IOS/Android platformasynyń artyqshylyqtaryn paıdalana otyryp, keńeıtilgen fýnksıonaldyǵy bar «Umit» mobıldi qosymshasyn iske qosýǵa da eńbektenip jatyr.