Iran astanasy Tegeranda ótip jatqan jabyq keshendegi XI Azııa chempıonatynyń 2-jarys kúni aıaqtaldy. Ulttyq qurama qorjynyna taǵy 3 medal tústi, dep habarlaıdy Egemen.kz Sport jáne týrızm mınıstrliginiń baspasóz qyzmetine silteme jasap.
Bıiktikke sekirýde Elızaveta Matveeva 1.86 metrdi baǵyndyryp, chempıon atandy. Byltyrǵy Astanadaǵy básekede bas júldeni Nadejda Dýbovıskaıa jeńip alǵan. Elızaveta ol kezde 2-orynnan kóringen edi.
Al 60 metrge júgirýde Olga Safronova (7.35 sekýnd) márege 2-bolyp jetti. Ol byltyr Astanada ótken Azııa chempıonatynda osy qashyqtyqta kúmis júldeger atanǵan.
Sondaı-aq úsh qarqyp sekirý saıysynda Marııa Efremova (13.48 metr) qola júldege ıe boldy.
Qazir Qazaqstan quramasynda 2 altyn, 2 kúmis, 2 qola medal bar. Tegerandaǵy chempıonat 19 aqpanda máresine jetedi.