Búgin Tótenshe jaǵdaılar mınıstri Shyńǵys Árinov elimizde kóktemgi sý tasqynyn boldyrmaý maqsatynda atqarylyp jatqan jumystardy Úkimet otyrysynda baıandady, dep jazady Egemen.kz.
Mınıstrdiń sózinshe, qazir respýblıkada sý tasqyny boıynsha jaǵdaı turaqty. Tótenshe jaǵdaıdyń aldyn alý boıynsha sharalar qabyldanǵan. Osy baǵytta «Kóktem» respýblıkalyq komandalyq-shtabtyq oqý-jattyǵý sheńberinde basqarý organdarynyń kúshteri men quraldarynyń naqty daıyndyǵy tekserilgen.
Sondaı-aq Shyńǵys Árinov sý tasqyny bola qalǵan jaǵdaıda halyqty qulaqtandyrý, zardap shekkenderdi jınaý pýnktteri daıyndalǵanyn aıtty.
«Budan bólek, eldi mekenderde ýaqytsha bógender salý (114 km), aryqtardy, kanaldardy (1 904 km), sondaı-aq avto jáne temir joldardaǵy sý ótkizý qurylystaryn tazartý (5 002 dana) naqty túrde júzege asyryldy. Eldi mekenderden 10,5 mln tekshe metrden astam qar shyǵaryldy», dedi Tótenshe jaǵdaılar mınıstri.