Batys Qazaqstan oblysyna qarasty Qaztalov aýdanynda 6 dáriger sý jańa úıli boldy. Olar Abaı, Túrkistan, Aqtóbe oblystarynan, Oral, Aqsaı qalalarynan arnaıy shaqyrylǵan jas mamandar edi.
Aqjaıyq óńirine dáriger mamandar jetispeıtinin buryn da talaı jazǵan edik. Byltyr óńir basshysy Narıman Tóreǵalıevtiń qoldaýymen Qaztalov aýdanyna kelgen 6 maman qyzmettik turǵyn úımen qamtamasyz etildi. Bul úıler zamanaýı úlgide, qurylysy sapaly, ári jartylaı jıhazben qamtylǵan. Ár úıdiń jeke jylytý, káriz júıesi bar. Jańa úılerdiń kiltin jańa qojaıyndaryna saltanatty túrde tabys etý úshin Qaztalov aýdanynyń ákimi Aslanbek Sarqulov, aýdandyq máslıhat tóraǵasy Sársenbaı Moldashev, aýdandyq №1 aýrýhananyń bas dárigeri Rýslan Ahmetjanov jáne aýyl turǵyndary jınalyp, kishigirim toı bolyp qaldy.
– Byltyr Qaztalov aýdanyndaǵy densaýlyq saqtaý salasynda biraz jetistik boldy, aýqymdy jobalar júzege asty. Atap aıtar bolsaq, Qaraoba dárigerlik ambýlatorııasy kúrdeli jóndeýden ótse, Qaraózen men Bostandyq aýyldarynda medısınalyq nysandar jańadan salynyp, el ıgiligine berildi. Munymen qosa aýdanymyzǵa 8 jedel járdem avtokóligi berildi. 761 mln teńge qarajatqa 51 túrli medısınalyq qural-jabdyq satyp aldyq, – dep Aslanbek Ahmetollauly aýdanda bolǵan jańalyqtardy atap ótti.
О́ńirde halyq densaýlyǵyn saqtaý salasynda oń ózgeris kóp, naqty jospar jasalǵan. Sonyń biri – Qaztalov aýdandyq aýrýhanasy ǵımaratyna 2024-2025 jyldary japsarlas qurylys júrgizip, kópbeıindi ortalyq aýrýhanaǵa aınaldyrý máselesi. Mekeme aýdanaralyq aýrýhana mártebesine ótkende qosymsha shtattar engizilip, 36 dáriger, 56 orta býyn medısınalyq qyzmetker qajet bolady eken. Sondyqtan elge keletin jas maman dáriger de, olarǵa arnaıy salynatyn turǵyn úı de az bolmasa kerek.
Baspanaly dárigerler qatarynda Túrkistan oblysynan kelgen jas maman, balalar dárigeri Ádilbek Qaldybekov te bar. Jas maman jańa úıine bas suqqan aýdan basshysyna alǵysyn aıtyp, aldaǵy ýaqytta aýdan halqynyń densaýlyǵyn jaqsartýǵa aıanbaı eńbek etetinin jetkizdi.
– Byltyr tamyz aıynda Marat Ospanov atyndaǵy Aqtóbe medısına akademııasyn jalpy tájirıbelik dáriger mamandyǵy boıynsha bitirip, qolyma dıplom alyp edim. Kúıeýim – kásipker. Jas maman, jas otbasy bolyp, qyrkúıek aıynda Qaztalovqa kelip edik. Búgin, mine, jarty jylǵa jetpeı 3 bólmeli jaıly páterge ıe bolyp jatyrmyz. Kóp-kóp rahmet! – deıdi Móldir Bekbatyrqyzy.
Móldirdiń áriptesi Dına Qajetqyzy qazirgi Abaı oblysyndaǵy Kókpekti óńirinde týyp-ósken eken. 2023 jyly Semeı medısına ýnıversıtetin támamdaǵan.
«О́tken jyly 4 qyrkúıekte Qaztalov topyraǵyna tabanym alǵash tıip edi. Sonaý Shyǵys Qazaqstannan elimizdiń batys qıyryna kelgende alańdaǵanym ras. Biraq bul jaqtyń adamdary da, aýa raıy da jaqsy eken. Úırenip kettim. Jumysym unaıdy. Aýdan ortalyǵyn, apta salyp Qoshankól, Tereńkól aýyldaryn aralap, halyqtyń densaýlyǵyn tekserip turamyz. Dál qazir tumaý, jelsheshek degen aýrýlar kóbeıińkirep tur, biraq bul qalypty jaǵdaı ǵoı. Jańa qonysymyz da keremet, unap jatyr», deıdi jalpy tájirıbelik dáriger Dına Qajetqyzy.
Batys Qazaqstan oblysy