Balalar ombýdsmeni áıelderdiń quqyqtary men balalardyń qaýipsizdigin qamtamasyz etý týraly jańa zań jobasy qabyldanǵannan keıin ne ózgeretinin túsindirdi, dep habarlaıdy Egemen.kz.
Búgin Memleket basshysy Qasym-Jomart Toqaevtyń tapsyrmasymen memlekettik organdarmen, depýtattarmen jáne ÚEU-nyń qatysýymen áıelderdiń quqyqtary men balalardyń qaýipsizdigin qamtamasyz etý týraly zań jobasy birinshi oqylymda qabyldandy.
«Jyl basynda Memleket basshysy zorlyq-zombylyqqa qarsy kúrestegi eń mańyzdy qaǵıdat — qoǵamda bul zulymdyqqa nóldik tózimdilikti damytýdy atap ótti. Osy postýlattyń iske asyrylýy zorlyq-zombylyq úshin jazanyń bultartpaýshylyq qaǵıdatyn qamtamasyz etetin osy zań jobasy bola alady», dep jazdy Dınara Zákıeva áleýmettik jelidegi paraqshasynda.
Bul rette, ombýdsmen qabyldanǵan zań jobasynda qandaı keshendi tásilder kózdelgenin túsindirip berdi.
Eń aldymen, bul tásilderge: zorlyq-zombylyqty aldyn alý sharalary; otbasyn qoldaý ortalyqtaryn ár aýdanda ashý; balalardy psıhologııalyq qoldaý ortalyqtaryn ashý; qıyn ómirlik jaǵdaıdaǵy otbasylarǵa kómek kórsetýdi uıymdastyrý quzyretin bekitý; agressormen psıhologııalyq jumys (QR QK erekshe talaptar ınstıtýtyn engizý aıasynda); zorlyq-zombylyqqa, býllıngke tap bolǵan balalarǵa kómek kórsetý baǵdarlamalaryn ázirleý quzyretin bekitý jatady.
«Ekinshiden, atalǵan tásilder aıasynda zorlyq-zombylyqty qylmystyq jaýapkershilikke jatqyzý, balalarǵa qatysty qylmystar úshin jazany qatańdatý: atap aıtqanda, azaptaý (maqalanyń jańa redaksııasy); densaýlyqqa aýyr, ortasha zııan keltirý úshin; kámeletke tolmaǵan adamdy urlaý jáne zańsyz bas bostandyǵynan aıyrý úshin; bala zorlaý úshin bas bostandyǵynan tek ómir boıyna ǵana aıyrý; «Balaǵa jynystyq sıpatta tıisý» babyn engizý; balaǵa qatysty zorlyq-zombylyqqa baılanysty qylmystardy tergeý áreketteri kezinde qamaýda ustaý; balalarǵa qyzmet kórsetetin uıymdardy lısenzııalaýdy engizý (MÁM, lagerler); balany avtobýstan májbúrlep túsirip tastaý úshin jaýapkershilik engizý; býllıng úshin jaýapkershilik jáne t. b qarastyrylady», dep tolyqtyrdy Dınara Zákıeva.
Balalar ombýdsmeni atalǵan zań jobasynyń jekelegen normalary áli de talqylanatynyn eskertip, zorlyq-zombylyq pen qatygezdiktiń eshqalaı túsindirilmeıtinin jáne aqtalmaıtynyn eske saldy.
«Balalar men áıelderge qatysty zorlyq-zombylyqqa tosqaýyl qoıa alatyn tıimdi jáne jumys isteıtin zań qabyldaýymyz mańyzdy», dep qorytyndylady ombýdsmen.