Búgin Májilistiń plenarlyq otyrysynda áıelderdiń quqyqtaryn jáne balalardyń qaýipsizdigin qamtamasyz etýge qatysty zań jobasy birinshi oqylymda qabyldandy. Osy oraıda QR Memlekettik keńesshisi Erlan Qarın áleýmettik jelide pikir qaldyrdy, dep jazady Egemen.kz.
Erlan Qarın atap ótkendeı, zań jobasynda turmystyq zorlyq-zombylyq máselelerin sheshýdiń jan-jaqty tásilderi qarastyrylǵan. Ol atalǵan qujat Prezıdenttiń byltyrǵy kúzde jarııalaǵan Joldaýyn júzege asyrý aıasynda ázirlengenin eske sala ketti.
«Jalpy, osy jobaǵa sáıkes túrli zań aktilerine 70 túzetý engizý kózdelip otyr. Sonyń ishinde, otbasylarǵa kómek kórsetý ınfraqurylymyn qalyptastyrýǵa baǵyttalǵan ózgeristerdi, sondaı-aq turmys salasyndaǵy qylmystar jáne balalarǵa qarsy jasalǵan zorlyq-zombylyqtyń barlyq túrleri úshin jazany kúsheıtýdi atap ótýge bolady.
Máselen, adamdy uryp-soqqany, densaýlyqqa jeńil, aýyrlyǵy ortasha jáne aýyr zııan keltirgeni, azaptap-qınaǵany úshin qylmystyq jaýapkershilik engizildi jáne kúsheıtildi», dep jazdy Memlekettik keńesshi.
Erlan Qarın turmystyq zorlyq-zombylyq faktilerin anyqtaýǵa jáne aldyn-alýǵa baǵyttalǵan birqatar shara kózdelgenin tilge tıek etti.
«Zań jobasyn depýtattar memlekettik organdarmen, sarapshylar qaýymdastyǵymen jáne qoǵamdyq uıymdarmen birlesip ázirledi.
Bul qujatty daıyndaýǵa Balalar quqyǵy jónindegi ýákil Dınara Zákıeva belsene atsalysty», dep túıindedi Erlan Qarın.