Ál-Farabı atyndaǵy QazUÝ-da Digital Farabi halyqaralyq forýmy aıasynda bos jumys oryndarynyń jármeńkesi ótti, dep habarlaıdy Egemen.kz.
Jármeńkege Halyk bank, «Beam.kz», Bank Sentr Kredıt, Kaspi Bank jáne basqa da jalpy sany 30-dan astam iri kompanııalar men uıymdar qatysty. Jumys berýshiler stýdentterge ártúrli saladaǵy bos jumys oryndaryn usyndy.
«Ýnıversıtetimizde dástúrli sharaǵa aınalǵan bos jumys oryndary jármeńkesi stýdentterge keń múmkindikter beredi. О́ıtkeni árbir kompanııa jaıynda tolyq aqparat alyp, bos jumys orny týraly málimettermen tanysý múmkindigi qarastyrylǵan. Bul óz kezeginde stýdent jastardy yntalandyryp, olardy eńbek naryǵyna baǵdarlaýǵa kómektesedi. Jármeńke jastarǵa taǵylymdamadan ótýge ári jumysqa ornalasýyna qolaıly jaǵdaı týǵyzady», deıdi mehanıka-matematıka fakýltetiniń mamany Smaıyl Erkebulan.
Atalǵan fakýltettiń magıstranty Yrysdáýlet Qarsybaıuly jármeńkege bıyl birinshi ret qatysyp otyr eken. Qazirgi ýaqytta jumys istep júrgenimen, basqa salada baǵyn synap kórgisi keletin jas mamannyń aıtýynsha, jármeńke stýdentter úshin kásibı jolyn bastaýdaǵy mańyzdy qadam bolatyny anyq ári bul alańda elimizdegi kompanııalar týraly kóp maǵulmat alýǵa bolady.
Oqý oryndarymen turaqty jumys istep kele jatqan «Beam.kz» kompanııasy satý bóliminiń jetekshisi Darııa Nurǵajyqyzy stýdentter men túlekterdi jumyspen qamtamasyz etýge baǵyttalǵan platforma jumysymen tanystyryp, stýdent jastardyń tájirıbesi bar-joǵyna qaramastan, birinshi kezekte arnaıy kýrstar uıymdastyrylatynyn aıtty. Munymen qosa oqýmen qatar jumys isteýge de múmkindikter qarastyrylǵan. Onyń aıtýynsha, búginde eńbek naryǵynda muǵalim, dáriger, zańger mamandyǵymen qatar ekonomıka, qarjy, IT salasynda suranys joǵary.