Qazaq Bilim akademııasynyń akademıgi, tarıh ǵylymdarynyń doktory, professor, elimizdegi joǵary mektep salasynyń uıymdastyrýshysy Amangeldi Qusaıynov atyndaǵy Eýrazııa gýmanıtarlyq ınstıtýtynda aıtýly tulǵanyń qurmetine ǵylymı-zertteý ortalyǵy ashyldy. Ashylý saltanaty aıasynda «Tulǵa jáne ult rýhanııaty» atty ǵylymı semınar ótti.
Jıyn barysynda Amangeldi Qusaıynulynyń bilim men ǵylymdy ıgerýdegi, ustazdyq jáne uıymdastyrýshylyq tájirıbesindegi belesteri, otandyq tarıhymyzdaǵy ǵalymnyń orny jóninde tushymdy oılar aıtylyp, jalpy tulǵalardy dáripteý, urpaq sanasyna sińirý izdenisteri talqylandy.
Semınar moderatory, tarıh ǵylymdarynyń doktory, professor, atalǵan oqý ornynyń prorektory Qadyr Ahmetov «Tulǵalardyń azamattyq ustanymdaryn zerdeleý – jastardyń boıyna otanshyldyqty qalyptastyrýdyń tetigi» ekenin aıtyp, ǵylymı-zertteý ortalyǵynyń maqsat-mindetterin tanystyrdy.
«Qazaq gazetteri» seriktestiginiń bas dırektory, akademık Dıhan Qamzabekuly: «Ǵalymnyń murasyn, eńbek jolyn, tán saýlyǵy men jan saýlyǵyna qatysty bastamalaryn qoǵamǵa, bilim júıesine keńinen nasıhattaý qajet», – dep, Amangeldi Qusaıynulynyń atqarǵan eńbegin, adamgershilik qasıetin atap ótti.
Al ınstıtýt dosenti, tarıh ǵylymdarynyń kandıdaty Samat Esqalıev ǵalymnyń el tarıhyna qatysty oı-tolǵanystary men birqatar zertteý eńbekterine toqtalyp, qaıyrymdylyq, kóshbasshylyq tujyrymdary negizinde joǵary oqý oryndarynda «Tulǵataný» kýrsyn júrgizýdiń mán-mańyzyn baıyptady. Sondaı-aq Túrkııa Respýblıkasy Tokat Gazı Osmanpasha ýnıversıtetiniń professory, «Túrki álemi» ǵylymı-zertteýler ortalyǵynyń dırektory Omer Farýk Sonmes ult rýhanııatyn qalyptastyrýdaǵy tulǵalardyń rólin zerdelep, joǵary mektepte túrki elderine ortaq tulǵalardy jańasha oqytý men dáripteýdi usyndy.
Jıynda L.Gýmılev atyndaǵy Eýrazııa ulttyq ýnıversıtetiniń professory Janat Aımuhambet, Nazarbaev ýnıversıtetiniń professory Janar Baıtelıeva jastardyń ulttyq sezimin oıatý, tól tarıhymyz ben rýhanı dúnıelerimizdi urpaq sanasyna sińirý maqsatynda birikken jobalar ázirleý týraly pikirlerin ortaǵa saldy.
Instıtýt rektory, psıhologııa ǵylymdarynyń kandıdaty, professor Amangeldi Ismaıylov tusaýy kesilgen ǵylymı ortalyq Amangeldi Qusaıynulynyń ǵylymdaǵy ıgi josparlaryn jalǵastyryp, bolashaqta gýmanıtarlyq ǵylymdardyń ózekti máselelerine arnalǵan zertteýler júrgizetinin aıtyp, qatysýshylarǵa alǵysyn jetkizdi.
Ǵylymı semınarǵa elordamyzdyń birqatar ǵalymdary, qoǵam qaıratkerleri jáne jastar qaýymy qatysty.
Laýra DÁÝRENBEKOVA,
A.Qusaıynov atyndaǵy Eýrazııa gýmanıtarlyq ınstıtýtynyń dosenti, fılologııa ǵylymdarynyń kandıdaty