Jyl basynan beri múgedektigi boıynsha jáne asyraýshysynan aıyrylý jaǵdaıy boıynsha memlekettik áleýmettik járdemaqylardy (MÁJ) tóleýge respýblıkalyq bıýdjetten shamamen 50,1 mlrd teńge jumsaldy. Buǵan qosymsha Memlekettik áleýmettik saqtandyrý qorynan (MÁSQ) eńbekke qabilettiliginen aıyrylý jáne asyraýshysynan aıyrylý boıynsha shamamen 6,6 mlrd teńge somasyna áleýmettik tólemder tólendi, dep jazady Egemen.kz Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.
«2024 jylǵy 1 aqpandaǵy jaǵdaı boıynsha múgedektigi boıynsha MÁJ alýshylar sany shamamen 537,3 myń, al asyraýshysynan aıyrylý jaǵdaıy boıynsha shamamen 192,9 myń adam. Múgedektigi boıynsha memlekettik áleýmettik járdemaqylardyń mólsheri múgedektiktiń tobyna jáne sebebine, sondaı-aq tıisti qarjy jylyna arnalǵan «Respýblıkalyq bıýdjet týraly» zańda belgilengen eń tómen kúnkóris deńgeıiniń shamasyna baılanysty bolady.
Asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri qaıtys bolǵan (qaza bolǵan) asyraýshynyń asyraýyndaǵy adamdardyń sanyna, qaıtys bolý sebepterine jáne eń tómen kúnkóris deńgeıine baılanysty bolady.
Budan basqa, mindetti áleýmettik saqtandyrý júıesine qatysýshylarǵa áleýmettik táýekelder týyndaǵan jaǵdaıda MÁSQ-ten áleýmettik tólemder tólenedi. Máselen, 2024 jylǵy 1 aqpandaǵy jaǵdaı boıynsha 85,7 myń adam eńbekke qabilettilikten aıyrylý boıynsha áleýmettik tólem, al asyraýshysynan aıyrylý boıynsha áleýmettik tólemdi shamamen 58,7 myń otbasy aldy.
Tólemderdiń mólsheri jeke bolady jáne mynalarǵa baılanysty: sońǵy 2 jyldaǵy MÁSQ-ke áleýmettik aýdarymdar júrgizilgen ortasha aılyq tabys, eńbekke qabilettiliginen aıyrylý koeffısıentteri, asyraýyndaǵy adamdar sany, mindetti áleýmettik saqtandyrý júıesine qatysý ótili jáne tabysty aýystyrý. Bul tólemder respýblıkalyq bıýdjetten tólenetin uqsas járdemaqylarǵa qosymsha júzege asyrylady.
2024 jylǵy 1 qańtardan bastap múgedektigi boıynsha jáne asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri eń tómen kúnkóris deńgeıiniń ulǵaıýyna baılanysty 7 %-ǵa ósti. Úkimettiń sheshimi boıynsha eńbekke qabilettiliginen aıyrylý jáne asyraýshysynan aıyrylý boıynsha MÁSQ-ten tólenetin tólemderdiń mólsheri de 7 %-ǵa artty.
Máselen, bıyl jalpy aýrýdan múgedektigi boıynsha MÁJ mólsheri 1-top úshin 95 496 teńge, 2-top úshin – 76 397 teńge, 3-top úshin – 52 089 teńgege jetti.
2024 jylǵy 1 aqpandaǵy jaǵdaı boıynsha eńbekke qabilettiliginen aıyrylý boıynsha MÁSQ-ten tólenetin áleýmettik tólemderdiń ortasha mólsheri 57 035 teńge bolsa, asyraýshysynan aıyrylý boıynsha 53 898 teńgege jetkeni», jazylǵan aqparatta.