Ál-Farabı atyndaǵy QazUÝ-da jumys oryndarynyń jármeńkesi ótti. Jármeńkege «Halyk bank», «Beam.kz», Bank Sentr Kredıt, «Kaspi Bank»-pen qatar 30-dan astam kompanııa qatysyp, jumys berýshiler stýdentterge ártúrli saladaǵy bos jumys oryndaryn usyndy.
«Ýnıversıtetimizde dástúrli is-sharaǵa aınalǵan jumys oryndary jármeńkesi stýdentterge keń múmkindikter beredi. О́ıtkeni árbir kompanııa jaıynda tolyq aqparat alyp, bos jumys orny týraly málimettermen tanysý múmkindigi qarastyrylǵan. Bul óz kezeginde stýdent jastardy yntalandyryp, olardy eńbek naryǵyna baǵdarlaýǵa kómektesedi. Jármeńke jastarǵa taǵylymdamadan ótýge ári jumysqa ornalasýyna qolaıly jaǵdaı týǵyzady» deıdi mehanıka-matematıka fakýltetiniń mamany Smaıyl Erkebulan.
Atalǵan fakýlttiń magıstranty Yrysdáýlet Qarsybaıulynyń jármeńkege bıyl birinshi ret qatysýy. Qazirgi ýaqytta jumys istep júrgenimen, basqa salada baǵyn synap kórgisi keletin jas mamannyń aıtýynsha, jármeńke stýdentter úshin kásibı jolyn bastaýdaǵy mańyzdy qadam bolatyny anyq ári bul alańda elimizdegi kompanııalar týraly kóp maǵlumat alýǵa bolady.
Oqý oryndarymen turaqty jumys istep kele jatqan «Beam.kz» kompanııasy satý bóliminiń jetekshisi Darııa Nurǵajyqyzy stýdentter men túlekterdi jumyspen qamtamasyz etýge baǵyttalǵan platforma jumysymen tanystyryp, stýdent jastardyń tájirıbesi bar-joǵyna qaramastan, birinshi kezekte arnaıy kýrstar uıymdastyrylatynyn atap ótti. Munymen qosa bilim ala júrip, jumys isteýine de teń múmkindikter qarastyrylǵan. Búginde eńbek naryǵynda muǵalim, dáriger, zańger mamandyǵymen qatar ekonomıka, qarjy, IT salasyna da suranys joǵary.
ALMATY