Almatydaǵy Balýan Sholaq atyndaǵy sport saraıynda kásipqoı bokstan jarys ótti. Tanymal boksshy Qanat Islam jetekshilik etetin «Qazaq promoýshen» kompanııasy uıymdastyrǵan týrnırde Qazaqstannan bólek О́zbekstan, Úndistan, Tájikstan, Túrkııa, Indonezııa jáne Qytaıdyń sportshylary qatysty. Osy keshtiń basty jekpe-jeginde alty jylǵa sozylǵan úzilisten keıin sharshy alańǵa qaıta oralǵan Rýslan Myrsataev túrkııalyq Hamza Gıýneshti birinshi raýndta uryp jyqty.
15-16 naýryz aralyǵynda Qytaıdyń Taıan qalasynda taekvondodan asa iri halyqaralyq týrnır ótedi. Parıj Olımpıadasynyń joldamalary sarapqa salynatyn baıraqty básekede Marııa Sevostıanova (57 kg), Jansel Denız (+67 kg), Samırhon Ababakırov (58 kg) jáne Batyrhan Tóleýǵalı (80 kg) tatamıde aıqasady.
11-13 naýryzda Astanadaǵy Jekpe-jek saraıynda Olımpıada jáne álem chempıony, Qazaqstannyń Eńbek Eri Jaqsylyq Úshkempirovtiń eske alýǵa arnalǵan jastar (U-20) arasyndaǵy halyqaralyq týrnırdiń shymyldyǵy túriledi. Osy básekede elimizdiń eń daryndy jastarymen qatar 10-nan asa shet memleketterden kelgen balýandar kúsh synasady dep kútilip otyr.
Keshe Fransııada veloshabandozdardyń Parıj-Nıssa kópkúndigi bastaldy. 10 naýryzǵa deıin sozylatyn dástúrli jarysta Samýele Battıstella, Alekseı Lýsenko, Dmıtrıı Grýzdev, Anton Charmıg, Krıstıan Skaronı Rıýdıger Zelıg jáne Harold Tehada syndy sportshylar «Astana» klýbynyń namysyn qorǵap jatyr.
31 naýryz ben 11 sáýir aralyǵynda Taılandtyń Phýket qalasynda aýyr atletıkadan Álem kýboginiń jalaýy jelbireıdi. Bul básekede bes jerlesimiz kúsh synasady. Olar – Aınur Ábdihalyqova (45 kg), Ernaz Alpysov (55 kg), Darıa Balabıýk (59 kg), Aısamal Sansyzbaeva (+87 kg) jáne Meıram Sultan (109 kg). Osy dodada basty úmit Aısamalǵa artylyp otyr. Ol – jasóspirimder men jastar arasyndaǵy álem jáne Azııa chempıony, álem birinshiliginiń qola júldegeri jáne Álem kýboginiń ıegeri.
Bokstan Italııanyń Býsto-Arsısıo qalasynda ótetin lısenzııalyq týrnırde Qytaıdyń qandaı quramda óner kórsetetini belgili boldy. Bir qýantarlyǵy, sol alpaýyt memlekettiń ulttyq quramasynyń kapıtany bolyp Danabek Baıǵazy taǵaıyndaldy. Asa aýyr salmaqta kúsh synasyp júrgen qandasymyz byltyr Hanchjoýdaǵy Azııa oıyndarynda qola medaldi ıelenip, Tashkenttegi álem chempıonatynyń shırek fınalyna deıin jetti.